ഇന്ത്യയിലും,യൂറോപ്പിലും ആശങ്ക അകന്നെങ്കിലും ഡെല്‍റ്റ വേരിയന്‍റ് മിഡില്‍ ഈസ്റ്റില്‍ നാലാം തരംഗത്തിന് കാരണമായതായി ലോകാരോഗ്യ സംഘടന

കെയ്​റോ: വാക്​സിനേഷന്‍ നിരക്ക്​ താരതമ്യേന കുറഞ്ഞ നിരക്കിലുള്ള മെഡിറ്ററേനിയന്‍ മേഖലയില്‍ ഡെല്‍റ്റ വകഭേദം കോവിഡ്​ നാലാം തരംഗത്തിന്​ തിരികൊളുത്തിയതായി ലോകാരോഗ്യ സംഘടന. 'ഡെല്‍റ്റ വകഭേദം കാരണം ലോകാരോഗ്യ സംഘടനയുടെ ഈസ്​റ്റേണ്‍ മെഡിറ്ററേനിയന്‍ മേഖലയില്‍ കോവിഡ്​ ബാധ രൂക്ഷമാകുകയാണ്​. പ്രദേശത്തെ 22ല്‍ 15 രാജ്യങ്ങളിലും ഡെല്‍റ്റ വകഭേദം റിപ്പോര്‍ട്ട്​ ചെയ്​തു' -ലോകാരോഗ്യ സംഘടന പ്രസ്​താവനയില്‍ പറഞ്ഞു.

പശ്ചിമേഷ്യന്‍ രാജ്യങ്ങളില്‍ ഡെല്‍റ്റ അതിവേഗം പടര്‍ന്ന്​ പിടിക്കുകയാണെന്നും വാക്​സിനേഷന്​ വിധേയമാകാത്തവരിലാണ്​ ഇത്​ കൂടുതലായും റിപ്പോര്‍ട്ട്​ ചെയ്യപ്പെടുന്നത്​.'കിഴക്കന്‍ മെഡിറ്ററേനിയന്‍ മേഖലയിലും ലോകാരോഗ്യ സംഘടനയുടെ മറ്റെല്ലാ മേഖലകളിലുമുള്ള ഡെല്‍റ്റ വകഭേദത്തിന്‍റെ അതിവേഗ വ്യാപനം ആശങ്കയുളവാക്കുന്നു. കഴിഞ്ഞ കുറച്ച്‌​ ആഴ്ചകളായി പുതിയ രോഗബാധയും മരണനിരക്കും വര്‍ധിച്ചു. പുതിയ കേസുകളില്‍ ഭൂരിഭാഗവും ആശുപത്രിയില്‍ പ്രവേശിപ്പിച്ചവരും വാക്​സിന്‍ എടുക്കാത്തവരാണ്​. മേഖല ഇപ്പോള്‍ കോവിഡ്​ നാലാം തരംഗത്തെ അഭിമുഖീകരിച്ച്‌​ കൊണ്ടിരിക്കുകയാണ്' -ഡബ്ല്യു​.എച്ച്‌​.ഒ റീജ്യനല്‍ ഡയരക്​ടര്‍ ഡോ. അഹ്​മദ്​ അല്‍ മന്ദരി പറഞ്ഞു​.

മുന്‍ മാസത്തെ അപേക്ഷിച്ച്‌​ പുതിയ രോഗബാധ 55 ശതമാനവും മരണം 15 ശതമാനവും വര്‍ധിച്ചു. ആഴ്ചയില്‍ 3,10,000 കേസുകളും 3500 മരണങ്ങളുമാണ്​ റിപ്പോര്‍ട്ട്​ ചെയ്യുന്നത്​. ഏറ്റവും കൂടുതല്‍ മരണങ്ങള്‍ റിപ്പോര്‍ട്ട്​ ചെയ്യപ്പെടുന്ന ഉത്തര ആഫ്രിക്കന്‍ രാജ്യമായ തുണീഷ്യയടക്കം കോവിഡ്​ തരംഗത്തോട്​ പൊരുതുകയാണ്​. ഓക്​സിജന്‍റെയും ഐ.സി കിടക്കകളുടെയും ക്ഷാമം പ്രദേശത്ത്​ ആരോഗ്യ സംവിധാനത്തെയാകെ പ്രതിസന്ധിയിലാക്കി.