ഝാര്‍ഖണ്ഡിലെ സര്‍ക്കാരിനെ അട്ടിമറിക്കാന്‍ 'ഒരു കോടിയും മന്ത്രിസ്​ഥാനവും' ബി.ജെ.പി വാഗ്​ദാനം ചെയ്​തെന്ന്​ കോണ്‍ഗ്രസ്​ എം.എല്‍.എ

റാഞ്ചി: ഝാര്‍ഖണ്ഡിലെ സഖ്യസര്‍ക്കാറിനെ അട്ടിമറിക്കാന്‍ ശ്രമിച്ചെന്നാരോപിച്ച്‌​ മൂന്നുപേര്‍ അറസ്റ്റിലായതിന്​ പിന്നാലെ, പണം വാഗ്​ദാനം ​ചെയ്​തുവെന്ന വെളിപ്പെടുത്തലുമായി കോണ്‍ഗ്രസ്​ എം.എല്‍.എ. മൂന്നുപേര്‍ നിരവധി തവണ തന്നെ സമീപിച്ചെന്നും സര്‍ക്കാറിനെ അട്ടിമറിക്കാന്‍ സഹായിച്ചാല്‍ ഒരു കോടി രൂപയും മന്ത്രിസ്​ഥാനം നല്‍കാമെന്ന വാഗ്​ദാനവും നല്‍കിയതായും കോലേബിറ എം.എല്‍.എ നമന്‍ ബിക്​സല്‍ കോങ്കാരി പറഞ്ഞു. ജെ.എം.എം, കോണ്‍ഗ്രസ്​ -ആര്‍.ജെ.ഡി സഖ്യമാണ്​ ഇപ്പോള്‍ ഝാര്‍ഖണ്ഡ്​ ഭരണത്തില്‍.

ആറോളം തവണ മൂന്നുപേര്‍ തന്നെ സമീപിച്ചു. ചില കമ്ബനികളില്‍ ജോലി ചെയ്യുന്നുവെന്ന്​ വ്യക്തമാക്കി തന്‍റെ പാര്‍ട്ടി പ്രവര്‍ത്തകര്‍ വഴിയാണ്​ മൂന്നുപേര്‍ കാണാനെത്തിയത്​. നിരവധി തവണ പോകാന്‍ ആവശ്യപ്പെട്ടിട്ടും വീണ്ടും ഇതേ ആവശ്യവുമായി അവര്‍ എത്തിയിരുന്നു. ഒരിക്കല്‍, അവര്‍ ഒരു കോടി രൂപ പണമായി നല്‍കാമെന്ന്​ അറിയിച്ചു. ഉടന്‍ തന്നെ താന്‍ സി.എല്‍.പി (കോണ്‍ഗ്രസ്​ ലെജിസ്ലേച്ചര്‍ പാര്‍ട്ടി) നേതാവ്​ അലംഗിര്‍ അലമിനെയും കോണ്‍ഗ്രസ്​ ഝാര്‍ഖണ്ഡ്​ നേതാവ്​ ആര്‍.പി.എന്‍. സിങ്ങിനെയും വിവരം അറിയിച്ചിരുന്നു. കൂടാതെ സംഭവത്തെക്കുറിച്ച്‌​ മുഖ്യമന്ത്രി ഹേമന്ത്​ സോറനും സൂചന നല്‍കിയിരുന്നു -എം.എല്‍.എ പറഞ്ഞു.

പണത്തിന്​ പുറമെ മന്ത്രിസ്​ഥാനവും അവര്‍ എനിക്ക്​ വാഗ്​ദാനം ചെയ്​തിരുന്നു. ന്യൂനപക്ഷ, ഗോത്ര വിഭാഗങ്ങളിലെ എല്ലാ പ്രശ്​നങ്ങളും പരിഹരിക്കാമെന്ന വാഗ്​ദാനവും അവര്‍ നല്‍കി. ഇത്​ ബി.ജെ.പിക്ക്​ വേണ്ടിയാണെന്നും അവര്‍ ഒരിക്കല്‍ പറഞ്ഞു. എന്നാല്‍ ബി.ജെ.പി പ്രവര്‍ത്തകരാരും ഇതുവരെ തന്നെ സമീപിച്ചിട്ടില്ല -കോങ്കാരി പറഞ്ഞു.

തന്നെ സമീപിച്ച മൂന്നുപേരെയാണോ ശനിയാഴ്ച അറസ്റ്റ്​ ചെയ്​തതെന്ന കാര്യം വ്യക്തമല്ല. അവരുടെ മുഖം ഓര്‍ത്തെടുക്കാന്‍ സാധിക്കുന്നി​​ല്ലെന്നും എം.എല്‍.എ കൂട്ടിച്ചേര്‍ത്തു.

ശനിയാഴ്ച അഭിഷേക്​ ദുബെ, അമിത്​ സിങ്​, നിവാരണ്‍ പ്രസാദ്​ മഹതോ എന്നിവരാണ്​ അറസ്റ്റിലാകുന്നത്​. റാഞ്ചി കോട്​വാലി പൊലീസ്​ ഇവര്‍ക്കെതിരെ കോണ്‍ഗ്രസ്​ ബെര്‍മോ എം.എല്‍.എ കുമാര്‍ ജയ്​മങ്കല്‍ പരാതി നല്‍കിയിരുന്നു. ക്രിമിനല്‍ ഗൂഡാലോചന ഉള്‍പ്പെടെയുള്ള കുറ്റങ്ങള്‍ ചുമത്തിയാണ്​ കേസ്​.

പ്രതികളിലൊരാളായ നിവാരണ്‍ പ്രസാദിന്‍റെ ഫേസ്​ബുക്ക്​ ബേജില്‍ ബി.ജെ.പിയുടെ ധാന്‍ബാദ്​ എം.പി പശുപതി നാഥും പ്രാദേശിക നേതാക്കളുമായി നില്‍ക്കുന്ന ചിത്രം പോസ്റ്റ്​ ചെയ്​തിട്ടുണ്ട്​. എന്നാല്‍ അറസ്റ്റിലായവര്‍ക്ക്​ പാര്‍ട്ടിയുമായി യാതൊരു ബന്ധവുമില്ലെന്നായിരുന്നു ബി.ജെ.പിയുടെ പ്രതികരണം.