തുണീഷ്യയില്‍ ഭരണ അട്ടിമറി;പ്രസിഡന്റ് പ്രധാനമന്ത്രിയെ പുറത്താക്കി, പാര്‍​ലമെന്‍റ്​ പിരിച്ചുവിട്ടു

തൂണിസ്​: സര്‍ക്കാറിനെതിരെ ജനം തെരുവിലിറങ്ങിയ തുണീഷ്യയില്‍ നിലവിലെ പ്രധാനമന്ത്രിയെയും പാര്‍ലമെന്‍റിനെയും പിരിച്ചുവിട്ട്​ പ്രസിഡന്‍റ്​ ഖൈസ്​ സഈദ്​. കോവിഡ്​ മഹാമാരി കൈകാര്യം ചെയ്യുന്നതിലെ പരാജയവും സമ്ബദ്​വ്യവസ്​ഥയുടെ തകര്‍ച്ചയും ചൂണ്ടിക്കാട്ടി രാജ്യത്തിന്‍റെ വിവിധ ഭാഗങ്ങളില്‍ ഹിശാം മിശ്ശീശി നേതൃത്വം നല്‍കുന്ന മന്ത്രിസഭക്കെതിരെ പ്രക്ഷോഭം ശക്​തമായതിനു പിന്നാലെയാണ്​ തന്‍റെ അധികാരം ഉപയോഗിച്ച്‌​ പ്രധാനമന്ത്രിയെ മാത്രമല്ല, പാര്‍ലമെന്‍റും പിരിച്ചുവിടുകയാണെന്ന്​ പ്രസിഡന്‍റ്​ പ്രഖ്യാപിച്ചത്​. പുതിയ പ്രധാനമന്ത്രിയുടെ സഹായത്തോടെ ഭരണം താന്‍ നിയന്ത്രിക്കുമെന്നും അദ്ദേഹം പറയുന്നു. എന്നാല്‍, ഇത്​ ഭരണ അട്ടിമറിയാണെന്ന്​ ഭരണകക്ഷി അന്നഹ്​ദ ആരോപിച്ചു.

പ്രസിഡന്‍റിനും പ്രധാനമന്ത്രിക്കും പാര്‍ലമെന്‍റിനുമിടയില്‍ അധികാരം വിഭജിച്ചുനല്‍കുന്ന ഭരണഘടനയുള്ള തുണീഷ്യ 2014നു ശേഷം ​േനരിടുന്ന ഏറ്റവും വലിയ ഭരണപ്രതിസന്ധിയാണിത്​. പ്രസിഡന്‍റിന്‍റെ കൊട്ടാരത്തില്‍ ചേര്‍ന്ന അടിയന്തര യോഗത്തിനൊടുവിലായിരുന്നു പാര്‍ലമെന്‍റ്​ പിരിച്ചുവിടുകയാണെന്ന പ്രഖ്യാപനം. പാര്‍ല​െമന്‍റ്​ അംഗങ്ങള്‍ക്ക്​ നല്‍കിയ സംരക്ഷയും അറസ്റ്റ്​ ചെയ്യപ്പെടാതിരിക്കാനുള്ള നിയമപരിരക്ഷയും ഇതോടൊപ്പം പിന്‍വലിക്കപ്പെട്ടിട്ടുണ്ട്​.

പാര്‍ലമെന്‍റിലെ ഏറ്റവും വലിയ കക്ഷിയായ അന്നഹ്​ദ, പ്രസിഡന്‍റിന്‍റെ നടപടിക്കെതിരെ ശക്​തമായി രംഗത്തെത്തി. ഭരണഘടനക്കും ജനകീയ വിപ്ലവത്തിനുമെതിരായ അട്ടിമറിയാണിതെന്ന്​ പാര്‍ലമെന്‍റ്​ സ്​പീക്കര്‍ കൂടിയായ അന്നഹ്​ദ നേതാവ്​ റാശിദ്​ ഗനൂശി കുറ്റപ്പെടുത്തി.

പ്രസിഡന്‍റ്​ ഖൈസ്​ സഈദും പ്രധാനമന്ത്രി മിശ്ശീശും തമ്മില്‍ ഒരു വര്‍ഷമായി നിലനില്‍ക്കുന്ന അഭിപ്രായ വ്യത്യാസം രൂക്ഷമായതിന്‍റെ തുടര്‍ച്ചയായാണ്​ പിരിച്ചുവിടല്‍. പാര്‍ലമെന്‍റും പ്രസിഡന്‍റും 2019ലെ രണ്ട്​ വ്യത്യസ്​ത തെരഞ്ഞെടുപ്പുകളിലാണ്​ തെരഞ്ഞെടുക്കപ്പെട്ടത്​. ചെറിയ കാലം മാത്രം നീണ്ടുനിന്ന ആദ്യമന്ത്രിസഭ അധികാരമൊഴിഞ്ഞതിനു പിറകെ കഴിഞ്ഞ വര്‍ഷമാണ്​ മിശ്ശീശ്​ അധികാരമേറിയത്​. ഈ സര്‍ക്കാറിനെ പിരിച്ചുവിടുമെന്ന്​ നേരത്തെ ​പ്രസിഡന്‍റ്​ മുന്നറിയിപ്പ്​ നല്‍കിയിരുന്നു.

1.2 കോടി ജനസംഖ്യയുള്ള തുണീഷ്യയില്‍ കോവിഡ്​ സാഹചര്യം രൂക്ഷമായി തുടരുന്നത്​ സമ്ബദ്​ഘടന​ തകര്‍ക്കുന്നതില്‍ വലിയ പങ്കു​വഹിച്ചിരുന്നു. മഹാമാരിക്കെതിരായ നടപടികളില്‍ സര്‍ക്കാര്‍ വന്‍വീഴ്​ചയായെന്ന വ്യാപക വിമര്‍ശനവുമുയര്‍ന്നു. ഇതാണ്​ പ്രസിഡന്‍റിന്‍റെ ഇടപെടലിലെത്തിയത്​. എന്നാല്‍, പ്രസിഡന്‍റ്​ ഭരണമേറ്റാലും സ്​ഥിതി മെച്ചമാകില്ലെന്നാണ്​ വിലയിരുത്തല്‍. രാജ്യത്ത്​ സ്​ഥിതി കൂടുതല്‍ ഗുരുതരമാകുമെന്ന ആശങ്കയും ശക്​തമാണ്​.

​കോവിഡ്​ പിടിമുറുക്കിയ രാജ്യത്ത്​ കടുത്ത നിയന്ത്രണങ്ങള്‍ക്കിടെയും പതിനായിരങ്ങളാണ്​ കഴിഞ്ഞ ദിവസം തെരുവിലിറങ്ങിയത്​. 'ജൂലൈ 25 പ്രസ്​ഥാനം' എന്ന പേരില്‍ പുതുതായി രൂപംനല്‍കിയ സംഘടനയാണ്​ പ്രക്ഷോഭത്തിന്​ നേതൃത്വം നല്‍കുന്നത്​. രാജ്യം സ്വാതന്ത്ര്യം നേടിയതിന്‍റെ 64ാം വാര്‍ഷികദിനത്തിലായിരുന്നു ബൂര്‍ഗിബ ചത്വരത്തില്‍ സമരത്തുടക്കം. 10 വര്‍ഷം മുമ്ബ്​ അറബ്​ വസന്തത്തിന്​ തുടക്കം കുറിച്ച അതേ വേദിയില്‍ ആരംഭമായ പ്രതിഷേധം രാജ്യത്തെ എവിടെയെത്തിക്കുമെന്ന ഭീതിയാണ്​ ആശങ്കയുണര്‍ത്തുന്നത്​.