ആശങ്ക ഉയര്‍ത്തി ടി.പി.ആര്‍; രോഗവ്യാപനം കൂടിയ ജില്ലകളില്‍ ഇന്ന് കൂട്ടപ്പരിശോധന

സംസ്ഥാനത്ത് ആശങ്ക ഉയര്‍ത്തി കൊവിഡ് ടെസ്റ്റ് പോസിറ്റിവിറ്റി നിരക്ക് ഉയരുന്നു. കഴിഞ്ഞ ഒരാഴ്ചയിലെ ശരാശരി ടി.പി.ആര്‍ 11.33 ആണ്. രോഗ വ്യാപനം കൂടിയ ജില്ലകളില്‍ ഇന്ന് കൂട്ട പരിശോധന നടത്താനാണ് തീരുമാനം. കോവിഡ് വീണ്ടും കുന്നുകയറുകയാണ്. ജൂണ്‍ 13ന് ശേഷം ഇന്നലെ ടെസ്റ്റ് പോസിറ്റിവിറ്റി നിരക്ക് 12ന് മുകളിലെത്തി. ചികിത്സയിലിരിക്കുന്നവരുടെ എണ്ണം 1,28, 000 കടന്നു. ഈ മാസം 15 മുതല്‍ ഇന്നലെ വരെയുള്ള ഒരാഴ്ചയിലെ ശരാശരി ടി.പി.ആര്‍ 11.33 ആണ്.. കഴിഞ്ഞ ദിവസങ്ങളിലെ ഇളവുകളുടെ പശ്ചാത്തലത്തില്‍ വരും ദിവസവും രോഗവ്യാപനം ഉയരും. പ്രതിദിന രോഗികളുടെ എണ്ണം ഇരുപതിനായിരത്തിന് മുകളിലാകുമെന്നാണ് ആരോഗ്യ വിദഗ്ധരുടെ വിലയിരുത്തല്‍. കേസുകള്‍ കൂടുന്നത് കണക്കിലെടുത്താണ് ഇന്ന് മൂന്ന് ലക്ഷം പരിശോധന നടത്തുന്നത്. ടെസ്റ്റ് പോസിറ്റിവിറ്റ് നിരക്ക് 10 ന് മുകളിലുള്ള ജില്ലകളിലാണ് കൂട്ട പരിശോധന. രോഗവ്യാപനം ഉയര്‍ന്ന് നില്‍ക്കുന്ന കോഴിക്കോട്, പാലക്കാട്, തൃശൂര്‍, മലപ്പുറം, കാസര്‍കോട് ജില്ലകളില്‍ കോവിഡ് പ്രതിരോധത്തിന് പ്രത്യേക ഉദ്യോഗസ്ഥരെ നിയമിച്ചിട്ടുണ്ട്.