ന്യൂഡല്‍ഹി: അഫ്ഗാനിസ്താനിലെ ഇന്ത്യന്‍ നിര്‍മിത ആസ്​തികളും നിര്‍മിതികളും ലക്ഷ്യമിടണമെന്ന്​ താലിബാനില്‍ ചേര്‍ന്ന പാകിസ്താനി പോരാളികളോടും താലിബാനോടും പാക് ചാരസംഘടനയായ ഐ.എസ്.ഐ നിര്‍ദേശം നല്‍കിയതായി റിപ്പോര്‍ട്ട്. അഫ്ഗാനിസ്താനിലെ ഇന്ത്യന്‍ അടയാളങ്ങളായ നിര്‍മിതികളെല്ലാം ഇല്ലാതാക്കുക എന്ന ലക്ഷ്യമാണ്​ ഇതിന്​ പിന്നിലെന്ന്​ ഉന്നത വൃത്തങ്ങള്‍ സൂചിപ്പിക്കുന്നു.​ 20 വര്‍ഷം കൊണ്ട്​ ഇന്ത്യ നിര്‍മിച്ച ആസ്​തികളെയാണ്​ ഐ.എസ്​.ഐ ലക്ഷ്യമിടുന്നത്​.

അഷ്‌റഫ് ഗനിയുടെ നേതൃത്വത്തിലുള്ള അഫ്ഗാനിസ്താന്‍ സര്‍ക്കാറിനെതിരായ താലിബാന്‍ ആക്രമണത്തെ പിന്തുണക്കുന്നതിനായി പതിനായിരത്തിലധികം പാക് പൗരന്‍മാര്‍ അഫ്ഗാനില്‍ പ്രവേശിച്ചതായാണ്​ കണക്കാക്കപ്പെടുന്നത്​. ഇന്ത്യന്‍ നിര്‍മിത വസ്​തുക്കള്‍ നശിപ്പിക്കണമെന്ന പ്രത്യേക നിര്‍ദേശങ്ങളുമായിട്ടാണ് പാകിസ്താന്‍ അഫ്​ഗാനിലേക്ക്​ ആളുകളെ അയച്ചിട്ടുള്ളതെന്ന് അഫ്ഗാന്‍ സര്‍ക്കാര്‍ നിരീക്ഷക വൃത്തങ്ങളെ ഉദ്ധരിച്ച്‌​ 'ഇന്ത്യ ടുഡേ' റിപ്പോര്‍ട്ട്​ ചെയ്​തു.

കഴിഞ്ഞ രണ്ട് പതിറ്റാണ്ടിനിടെ ഇന്ത്യ അഫ്ഗാനിസ്താന്‍റെ പുനര്‍നിര്‍മാണത്തില്‍ മൂന്ന് ബില്യന്‍ ഡോളര്‍ നിക്ഷേപിച്ചിട്ടുണ്ട്. ഡെലാറാമിനും സരഞ്ച് സല്‍മ ഡാമിനുമിടയിലെ 218 കിലോമീറ്റര്‍ റോഡും 2015ല്‍ ഉദ്ഘാടനം ചെയ്ത പാര്‍ലമെന്‍റ്​ കെട്ടിടവുമെല്ലാം അഫ്ഗാന്‍ ജനതയ്ക്കുള്ള ഇന്ത്യന്‍ സംഭാവനയുടെ ഏറ്റവും വലിയ പ്രതീകമാണ്.

ഹെറാത്ത്​ പ്രവിശ്യയിലെ ചിശ്​ത്​ ജില്ലയില്‍ വൈദ്യുതി വിതരണം നടത്തുന്നതിന്​ അഫ്​ഗാന്‍-ഇന്ത്യ സൗഹൃദ സ്​മാരകമായി നിലകൊള്ളുന്ന സല്‍മ ഡാമില്‍ കഴിഞ്ഞ ദിവസം താലിബാന്‍ ബോംബിട്ടിരുന്നതായി റിപ്പോര്‍ട്ടുകളുണ്ടായിരുന്നു.