കാബൂള്‍: പതിറ്റാണ്ടുകള്‍ നീണ്ട ആധിപത്യം അവസാനിപ്പിച്ച്‌​ സൈനിക പിന്മാറ്റത്തിനൊരുങ്ങുന്ന അമേരിക്ക വീണ്ടും അഫ്​ഗാനിസ്​താന്‍ ആക്രമിച്ചേക്കുമെന്ന്​ സൂചന. അടുത്ത സെപ്​റ്റംബര്‍ 11നകം എല്ലാ സൈനികരെയും അഫ്​ഗാനിസ്​താനില്‍നിന്ന്​ പിന്‍വലിക്കുമെന്നായിരുന്നു പ്രസിഡന്‍റ്​ ജോ ബൈഡന്‍റെ പ്രഖ്യാപനം. എന്നാല്‍, യു.എസ്​ സൈന്യം മടങ്ങുന്നതോടെ കരുത്തരായ താലിബാന്‍ കാബൂള്‍ ഉള്‍പെടെ പിടിക്കുമെന്ന ഭീഷണി നിലനില്‍ക്കുകയാണ്​. നിലവില്‍ പിന്മാറ്റത്തിനു ശേഷം അഫ്​ഗാന്‍ ഔദ്യോഗിക ഭരണകൂടത്തിന്​ സൈനിക സഹായം നല്‍കാന്‍ യു.എസ്​ വ്യവസ്​ഥ ചെയ്​തിട്ടില്ല.

എന്നാല്‍, താലിബാന്‍ പൂര്‍ണ നിയന്ത്രണത്തിലാക്കിയാല്‍ അഫ്​ഗാനിസ്​താനില്‍ തുടര്‍ന്നും അമേരിക്കന്‍ ലക്ഷ്യങ്ങള്‍ സംരക്ഷി​ക്കപ്പെടാന്‍ ആക്രമണമല്ലാതെ വഴിയില്ലെന്നാണ്​ പെന്‍റഗണ്‍ നല്‍കുന്ന സൂചന. അതിനായി ബോംബര്‍ വിമാനങ്ങളും ഡ്രോണുകളും ഉപയോഗിച്ച്‌​ ആക്രമണം നടത്തിയേക്കും.

നിലവില്‍ അഫ്​ഗാനിസ്​താന്‍റെ ഗ്രാമീണ മേഖലകളിലേറെയും താലിബാന്‍ നിയന്ത്രണത്തിലാണ്​. ഇവിടങ്ങളില്‍ നിലവിലെ ഔദ്യോഗിക സര്‍ക്കാറിന്​ പ്രവേശനം പോലുമില്ല. അത്​ അവശേഷിച്ച ഭാഗങ്ങളിലേക്ക്​ കൂടി വ്യാപിച്ചാല്‍ രാജ്യത്തിന്‍റെ സമ്ബൂര്‍ണ നിയന്ത്രണം താലിബാന്​ ഒറ്റക്കാകും.

നിലവില്‍ സൈനിക പിന്മാറ്റത്തിനു പുറമെ വര്‍ഷങ്ങളായി അമേരിക്കന്‍ സേനയുടെ സഹായികളായി നിന്നവരെയും ഒഴിപ്പിക്കാന്‍ യു.എസ്​ നിര്‍ബന്ധിതരാണ്​. ഇവരെ താലിബാന്‍ വേട്ടയാടുമെന്ന ആശങ്കയാണ്​ വിഷയം.