കൊറോണ വൈറസ്​ വുഹാനിലെ ചൈനീസ് ലാബില്‍ നിന്നും ചോര്‍ന്നതാകാമെന്ന് യു.എസ് പഠന റിപ്പോര്‍ട്ട്​ പുറത്ത്​ വിട്ട്​ വാള്‍സ്​ട്രീറ്റ്​ ​ജേണല്‍. യു.എസ്​ ഗവണ്‍മെന്റിന്​ കീഴിലുള്ള നാഷണല്‍ ലബോറിട്ടറിയാണ്​ പഠനം നടത്തിയത്​. ഇതുമായി ബന്ധപ്പെട്ട്​ കൂടുതല്‍ പരിശോധന വേണമെന്നും പഠനത്തില്‍ പറയുന്നു. ഇത് സംബന്ധിച്ച്‌ വീണ്ടും അന്വേഷണം നടത്താന്‍ യുഎസ് പ്രസിഡന്റ് ജോ ബൈഡന്‍ രഹസ്യാന്വേഷണ ഏജന്‍സികള്‍ക്ക് നിര്‍ദേശം നല്‍കി എന്നും റിപ്പോര്‍ട്ടുകളുണ്ട്. കാലിഫോര്‍ണിയയിലെ ലോറന്‍സ്​ ലിവ്​മോര്‍ നാഷണല്‍ ലബോറട്ടറിയാണ്​ കൊറോണ വൈറസിനെ കുറിച്ചുള്ള പഠനത്തിന്​ പിന്നില്‍.മുന്‍ യു.എസ്​ പ്രസിഡന്റ്​ ഡോണള്‍ഡ്​ ട്രംപ്​ അധികാരമൊഴിയാന്‍ മാസങ്ങള്‍ മാത്രം ബാക്കി നില്‍ക്കെയായിരുന്നു പഠനം. കൊറോണ വൈറസിന്റെ ജീനുകളെ പഠനവിധേയമാക്കിയാണ്​ ലബോറട്ടറി പഠന റിപ്പോര്‍ട്ട്​ തയാറാക്കിയതെന്നും വാള്‍സ്​ട്രീറ്റ്​ ജേണല്‍ പറയുന്നു.

ചൈന കൊറോണ വൈറസ് ഔദ്യോഗികമായി സ്ഥിരീകരിക്കുന്നതിനു മുമ്ബ് വുഹാനിലെ വൈറോളജി ഇന്‍സ്റ്റിറ്റ്യൂട്ടിലെ മൂന്നു ഗവേഷകര്‍ രോഗബാധിതരായി ചികിത്സ തേടിയിരുന്നുവെന്ന് യു.എസ് രഹസ്യാന്വേഷണ റിപ്പോര്‍ട്ട് ചൂണ്ടിക്കാട്ടിയിരുന്നു. വൈറസിന്റെ ഉത്ഭവത്തെക്കുറിച്ച്‌ ചൈന സുതാര്യത പുലര്‍ത്തുന്നില്ലെന്നാണ് അമേരിക്കയുടെ ആരോപണം.

കൊറോണ വൈറസിന്റെ ഉദ്​ഭവത്തെ കുറിച്ച്‌​ രണ്ട്​ സാധ്യതകളാണ്​ യു.എസ്​ രഹസ്യാന്വേഷണ ഏജന്‍സികള്‍ മുന്നോട്ട്​ വെക്കുന്നത്​. വൈറസ്​ വുഹാനിലെ ലാബില്‍ നിന്ന്​ ചോര്‍ന്നതാകാമെന്ന്​ യു.എസ്​ രഹസ്യാന്വേഷണ ഏജന്‍സികള്‍ സംശയിക്കുന്നുണ്ട്​. അല്ലെങ്കില്‍ മൃഗങ്ങളില്‍ നിന്ന്​ വൈറസ്​ മനുഷ്യരിലേക്ക്​ പകര്‍ന്നതാകാം.