വാഷിങ്​ടണ്‍: അമേരിക്കയില്‍ ഡോണാള്‍ഡ്​ ട്രംപ്​ ഭരണത്തിലിരിക്കെ 31 ചൈനീസ്​ കമ്പനികള്‍ക്ക്​ ഏ​ര്‍പെടുത്തിയ ഉപരോധം വ്യാപിപ്പിച്ച്‌​ പുതിയ പ്രസിഡന്‍റ്​ ജോ ബൈഡന്‍. പുതിയ 28 ചൈനീസ്​ കമ്പനികളില്‍ യുഎസ് കമ്ബനികള്‍ക്കും വ്യക്​തികള്‍ക്കും നിക്ഷേപമിറക്കുന്നതിനാണ്​​ വിലക്കേര്‍പ്പെടുത്തിയത് ​. ഇവ ചൈനയുടെ സൈനിക വ്യവസായ മേഖലയില്‍ പ്രവര്‍ത്തിക്കുന്നവയാണെന്നാണ്​ വിലയിരുത്തല്‍ .

നേരത്തെ, ട്രംപ്​ വില​ക്കേര്‍പെടുത്തിയപ്പോഴും സമാന കാരണമാണ്​ ഉന്നയിച്ചിരുന്നത്​. മുന്‍നിര ടെലികോം, നിര്‍മാണ, സാ​ങ്കേതിക സ്​ഥാപനങ്ങളായ ചൈന മൊബൈല്‍, ചൈന ടെലികോം, വിഡിയോ സര്‍വയലന്‍സ്​ കമ്ബനി ഹിക്​വിഷന്‍, ചൈന റെയില്‍വേ കണ്‍സ്​ട്രക്​ഷന്‍ കോര്‍പ്​ തുടങ്ങിയവ കമ്ബനികളെയായിരുന്നു ട്രംപ്​ യുഎസില്‍ വിലക്കിയത് .ഇതിലുള്‍പെടുത്തിയിരുന്ന ഏവിയേഷന്‍ ഇന്‍ഡസ്​ട്രി കോര്‍പ്​ ഓഫ്​ ചൈന, ചൈന നാഷനല്‍ ഓഫ്​ഷോര്‍ ഓയില്‍ കോര്‍പ്​, ചൈന മൊബൈല്‍ കമ്യൂണിക്കേഷന്‍സ്​ ഗ്രൂപ്​, വാവയ്​ ടെക്​നോളജീസ്​ ആന്‍റ്​ സെമികണ്ടക്​ടര്‍ മാനുഫാക്​ചറിങ്​ ഇന്‍റര്‍നാഷനല്‍ കോര്‍പ്​ (എസ്​.എം.ഐ.സി) തുടങ്ങിയവ പുതിയ ലിസ്റ്റിലും ഇടംപിടിച്ചിട്ടുണ്ട്​. ചിപ്​ നിര്‍മാണ മേഖലയില്‍ ആഗോള തലത്തില്‍ ഏറ്റവും പ്രശസ്​തമായ കമ്ബനികളിലൊന്നാണ്​ എസ്​.എം.ഐ.സി.

അതെ സമയം ചൈനയുമായി നയതന്ത്ര ചര്‍ച്ചകള്‍ പുനരാരംഭിച്ച ബൈഡന്‍ ഭരണകൂടം പ്രതിരോധ, സാ​ങ്കേതിക രംഗങ്ങളില്‍ നിയന്ത്രണം കടുപ്പിക്കുമെന്ന്​ നേരത്തെ പ്രഖ്യാപിച്ചിരുന്നു. ഇതേ തുടര്‍ന്നാണ് പുതിയ കമ്ബനികള്‍ കൂടി ഉപരോധ പട്ടികയില്‍ ഉള്‍പെടുത്തിയത്​. ഈ മേഖലയില്‍ നേരത്തെ നിക്ഷേപമുള്ളവര്‍ക്ക്​ അവ പിന്‍വലിക്കാന്‍ സാവകാശം നല്‍കും. അതെ സമയം യുഎസിന്റെ പുതിയ നിയന്ത്രണങ്ങള്‍ക്കെതിരെ ചൈന കടുത്ത വിമര്‍ശനവുമായി രംഗത്തെത്തിയിട്ടുണ്ട്​.

അതേ സമയം, വിമാന നിര്‍മാണ രംഗത്തെ ആഗോള ഭീമന്മാരായ ബോയിങ്​, എയര്‍ബസ്​ എന്നിവയോട്​ ഏറ്റുമുട്ടാന്‍ ചൈന രൂപം നല്‍കിയ കൊമേഴ്​സ്യല്‍ എയര്‍ക്രാഫ്​റ്റ്​ കോര്‍പ്​ ഓഫ്​ ചൈനക്ക് വിലക്കേര്‍പ്പെടുത്തിയിട്ടില്ല . ഡോണാള്‍ഡ് ട്രംപ്​ നേരത്തെ വിലക്കുകയും പിന്നീട്​ ഒഴിവാക്കുകയും ചെയ്​ത ​ഷഓമിയും പട്ടികയിലില്ലെന്നത്​ ശ്രദ്ധേയമാണ്​.