ഒ.എന്‍.ജി.സിയെ ചെറുകമ്പനികളാക്കി സ്വകാര്യവത്കരിക്കാനൊരുങ്ങി കേന്ദ്രം

ന്യൂഡല്‍ഹി: പൊന്മുട്ടയിടുന്ന താറാവായ ​പെട്രോളിയം കമ്പനി à´’.എന്‍.ജി.സിയെ അതിവേഗം വിറ്റുതുലക്കാന്‍ കേന്ദ്രം വീണ്ടും. എണ്ണപ്പാടങ്ങള്‍ സ്വകാര്യമേഖലക്ക്​ കൈമാറാനും എണ്ണ ഖനനം ഉള്‍പെടെ സേവനങ്ങള്‍ വിവിധ കമ്പനികള്‍ക്കായി മുറിച്ചുനല്‍കാനും നിലവിലെ അടിസ്​ഥാന സൗകര്യങ്ങള്‍​ പണമാക്കിമാറ്റാനുമാണ്​ പെട്രോളിയം മന്ത്രാലയത്തിന്റെ  നി​ര്‍ദേശം​.

ഏപ്രില്‍ ഒന്നിന്​ മന്ത്രാലയത്തിലെ അഡീഷനല്‍ സെക്രട്ടറി അമര്‍ നാഥ്​ അയച്ച കത്തില്‍ ഒ.എന്‍.ജി.സിക്ക്​ മുന്നില്‍ വെക്കുന്നത്​ ഏഴിന കര്‍മപദ്ധതിയാണ്​. 2023- 24 ഓടെ എണ്ണ ഉല്‍പാദനം മൂന്നിലൊന്ന്​ ഉയര്‍ത്തുന്നതാണ്​ പദ്ധതിയെന്ന്​ കത്ത്​ പറയുന്നു.

പശ്​ചിമ തീരങ്ങളിലെ പന്ന- മുക്​ത, രത്​ന, ആര്‍- സീരീസ്​ എണ്ണപ്പാടങ്ങള്‍, ഗുജറാത്തിലെ ഗന്ധര്‍ എന്നിവയിലെ ഓഹരികള്‍ സ്വകാര്യ മേഖലക്ക്​ വില്‍ക്കാന്‍ ഒ.എന്‍.ജി.സിയോട്​ ​ശുപാര്‍ശ ചെയ്യുന്നു. അടുത്ത വര്‍ഷത്തോടെ ഉല്‍പാദനം വര്‍ധിക്കുമെന്ന്​ പ്രതീക്ഷിക്കുന്ന എണ്ണ സമ്ബന്നമായ കെ.ജി-ഡി.ഡബ്ല്യു.എന്‍-98/2, പശ്​ചിമ ബംഗാളില്‍ പുതുതായി ഉല്‍പാദനം ആരംഭിച്ച അശോക്​നഗര്‍ എണ്ണപ്പാട​ങ്ങളില്‍ വിദേശ പങ്കാളിത്തം ക്ഷണിക്കാനും നിര്‍ദേശം നല്‍കിയിട്ടുണ്ട്​. വര്‍ഷങ്ങള്‍ക്ക്​ മുൻപ് ഗുജറാത്ത്​ സര്‍ക്കാറിനുകീഴിലെ ജി.എസ്​.പി.സിയില്‍നിന്ന്​ വാങ്ങിയ ദീന്‍ദയാല്‍​ ബ്ലോക്കിലും സ്വകാര്യ പങ്കാളിത്തത്തിന്​ നിര്‍ദേശം നല്‍കുന്നു​. എണ്ണ പര്യവേക്ഷണം, ഖനനം, അനുബന്ധ സേവനങ്ങള്‍, ഡേറ്റ പ്രോസസിങ്​ എന്നിവയൊക്കെയും വെവ്വേറെ കമ്പനികള്‍ക്കു കീഴിലാക്കുന്നതും മന്ത്രാലയത്തിന്‍റെ ശിപാര്‍ശകളില്‍ പെട്ടതാണ്​.

ഒ.​എന്‍.ജി.സിക്കു കീഴിലെ എണ്ണ, വാതകപാടങ്ങള്‍ സ്വകാര്യമേഖലക്ക്​ കൈമാറാന്‍ മോദി സര്‍ക്കാര്‍ നടത്തുന്ന മൂന്നാം ശ്രമമാണിത്​.

2017 ഒക്​ടോബറില്‍ ഒ.എന്‍.ജി.സിക്കു കീഴിലെ 15 എണ്ണപ്പാടങ്ങളും 79.12കോടി ടണ്‍ ക്രൂഡ്​ ഓയിലും 33.34 കോടി ക്യുബിക്​ മീറ്റര്‍ പ്രകൃതി വാതകവും വില്‍പനക്കായി മന്ത്രാലയം ​അടയാളപ്പെടുത്തിയിരുന്നു. ഒരു വര്‍ഷം കഴിഞ്ഞ്​ ഇതിന്‍റെ എണ്ണം കൂടി ചെറിയവ ഉള്‍പെടെ 149 എണ്ണപ്പാടങ്ങള്‍ ഈ ഗണത്തില്‍ മന്ത്രാലയം ഉള്‍പെടുത്തി. ഇതുപക്ഷേ, ഒ.എന്‍.ജി.സിയില്‍നിന്നുള്ള കടുത്ത എതിര്‍പ്പില്‍ എവിടെ​യുമെത്താതെ പോയി.2019 ഫെബ്രുവരിയില്‍ വീണ്ടും കേന്ദ്ര മന്ത്രിസഭയിലെത്തിയ പദ്ധതി 64 എണ്ണപ്പാടങ്ങള്‍ വില്‍ക്കാന്‍ തീരുമാനിച്ചു. പക്ഷേ, അപേക്ഷകര്‍ ചെറുതാവുകയും നിക്ഷേപ പ്രഖ്യാപനങ്ങള്‍ ​ശുഷ്​കമാകുകയും ചെയ്​തതോടെ അതും ഉപേക്ഷിച്ചു.

ഇതിന്‍റെ തുടര്‍ച്ചയായാണ്​ മൂന്നാം പ്രഖ്യാപനം വരുന്നത്​. 2019ലെ പ്രഖ്യാപനം വന്ന്​ രണ്ടുവര്‍ഷം കഴിഞ്ഞെന്നും ഇനിയും കാത്തിരിക്കാനാകില്ലെന്നുമാണ്​ കേന്ദ്ര നിലപാട്​.2020-21 സാമ്പത്തിക വര്‍ഷം ഒ.എന്‍.ജി.സി എണ്ണപാടങ്ങളില്‍നിന്ന്​ 2.02 കോടി ടണ്‍ അസംസ്​കൃത എണ്ണയാണ്​ ഉല്‍പാദിപ്പിച്ചത്​. 21.87 ബില്യണ്‍ ക്യുബിക്​ മീറ്റര്‍ പ്രകൃതിവാതകവും. രണ്ടു വര്‍ഷം കഴിയുമ്പോഴെക്കു ​ എണ്ണ ഇരട്ടിയായും പ്രകൃതി വാതകം ഇരട്ടിയിലേറെയായും വര്‍ധിപ്പിക്കുകയാണ്​ ലക്ഷ്യം.