ലോകം ഡ്രോണ്‍ യുഗത്തില്‍ by സംഗീത ചേനംപുല്ലി

യുദ്ധത്തിനും സമാധാനത്തിനും ഡ്രോണുകളെന്ന ആളില്ലാ ചെറുവിമാനങ്ങള്‍ ഉപയോഗിക്കുന്ന സ്ഥിതിയിലേക്ക് എത്തുകയാണ് കാര്യങ്ങള്‍. വിവാഹ ഫോട്ടോഗ്രാഫിക്കും ടെലിവിഷന്‍ ഷൂട്ടിങിനും ആകാശനിരീക്ഷണത്തുമൊക്കെ ഡ്രോണുകള്‍ ഉപയോഗിക്കുന്നു. ഒപ്പം സ്വകാര്യതയ്ക്കും സുരക്ഷയ്ക്കും അവ വെല്ലുവിളിയുമാകുന്നു

ചിത്രം കടപ്പാട്: Paul Mayall/AP

കഴിഞ്ഞ വേനല്‍ക്കാലത്ത് ഉത്തരേന്ത്യയിലെ പല നഗരങ്ങളും വിചിത്രമായ ഒരു കാഴ്ചയുടെ അത്ഭുതത്തിലായിരുന്നു. നഗരത്തിന് മീതെ പറക്കുന്ന വലിയൊരു ഹനുമാന്‍. ഒരു സ്മാര്‍ട്ട്‌ഫോണ്‍ നിയന്ത്രിത ഡ്രോണിന്റെ സഹായത്തോടെയായിരുന്നു സോണി à´Ÿà´¿.വി സംപ്രേക്ഷണം ചെയ്യാന്‍ പോകുന്ന പുതിയ പരമ്പരയുടെ പ്രചാരണാര്‍ഥം ഹനുമാന്‍ പറന്നത്. 

വിശ്വാസവും പുത്തന്‍ സാങ്കേതികവിദ്യയും സമ്മേളിക്കുന്നതിലെ വൈരുധ്യമുണ്ടെങ്കിലും വരുംദശകങ്ങളില്‍ നാം കാണാന്‍ പോകുന്ന പല വിചിത്രമായ ആകാശക്കാഴ്ച്ചകളുടെയും സൂചനയായിരുന്നു അത്. 

ഡ്രോണുകള്‍ എന്ന് പൊതുവേ അറിയപ്പെടുന്ന ആളില്ലാ ആകാശയാനങ്ങളുടെ (Unmanned aerial vehicle - UAV) കാലമാണ് വരാന്‍ പോകുന്നത്. ചെറുകിട ഹോട്ടലിലേക്ക് സാധനങ്ങളുമായി ടോക്കിംഗ് ഡ്രോണ്‍ പറന്നുവരുന്ന പ്രമുഖ മൊബൈല്‍ കമ്പനിയുടെ പരസ്യത്തിലെ പോലെ ആവശ്യമുള്ളതെന്തും വാതില്‍പ്പടിയില്‍ പറന്നെത്തുന്ന കാലം വിദൂരമല്ല. ആളില്ലാ ചാര, യുദ്ധ വിമാനങ്ങള്‍ എന്ന സങ്കല്‍പ്പത്തില്‍ നിന്ന് ഏറെ വളര്‍ന്നു കഴിഞ്ഞു ഡ്രോണുകള്‍ എന്ന യന്ത്രപ്പറവകളുടെ സാങ്കേതിക വിദ്യയും സാധ്യതകളും.

സ്വയം പ്രവര്‍ത്തിക്കുന്ന യുദ്ധവിമാനങ്ങള്‍ വികസിപ്പിക്കാന്‍ 1950കളില്‍ തന്നെ അമേരിക്ക ഊര്‍ജ്ജിതശ്രമം ആരംഭിച്ചിരുന്നു. ഇന്നും സൈനിക രംഗത്ത് തന്നെയാണ് ഡ്രോണുകള്‍ ഏറ്റവും കൂടുതല്‍ ഉപയോഗിക്കപ്പെടുന്നത്. എങ്കിലും അടുത്ത ദശകത്തോടെ സൈനിക ഉപയോഗത്തെ സിവിലിയന്‍ ഡ്രോണ്‍ ഉപയോഗം ബഹുദൂരം പിറകിലാക്കുമെന്ന് കരുതപ്പെടുന്നു. രക്ഷാപ്രവര്‍ത്തനം മുതല്‍ വിനോദം വരെയുള്ള വിവിധ മേഖലകളില്‍ ഇവയ്ക്കുള്ള പ്രയോഗസാധ്യത തന്നെയാണ് കാരണം. 

ആളില്ലാ ആകാശയാനങ്ങളെ പൊതുവേ രണ്ടായി തിരിക്കാം; സ്വയം നിയന്ത്രിത യാനങ്ങളും, വിദൂര നിയന്ത്രിത യാനങ്ങളും. സുരക്ഷ കണക്കിലെടുത്ത് സ്വയം നിയന്ത്രിത ഡ്രോണുകള്‍ ഇപ്പോള്‍ ഉപയോഗത്തിലില്ല. 

സാധനങ്ങളെത്തിക്കാന്‍ ആമസോണിന്റെ ഡ്രോണ്‍