തോക്കിന്‍ മുനയില്‍​​ അമേരിക്ക;കടുത്ത നിയന്ത്രണവുമായി​ ഭരണകൂടം

വാഷിങ്​ടണ്‍: അമേരിക്കയെ തോക്കിന്‍മുനയില്‍ നിര്‍ത്തി വെടിവെപ്പ്​ സംഭവങ്ങള്‍ വര്‍ധിച്ചതോടെ കടുത്ത നിയമങ്ങളുമായി ബൈഡന്‍ ഭരണകൂടം. പ്രത്യേക അനുമതിയില്ലാതെ വിപണിയിലെത്തുന്ന നാടന്‍ തോക്കുകളുടെ നിര്‍മാണവും ഉപയോഗവും നിയന്ത്രിച്ചാണ്​ സര്‍ക്കാര്‍ പുതിയ നിയമം പുറത്തിറക്കിയത്​. കോണ്‍ഗ്രസിന്‍റെ പിന്തുണ ആവശ്യമില്ലാത്ത പ്രസിഡന്‍റിന്‍റെ പ്രത്യേക അധികാരമുപയോഗിച്ചായിരുന്നു നിയമ നിര്‍മാണം.
അതേ സമയം, യു.എസ്​ ഭരണഘടനയുടെ രണ്ടാം ഭേദഗതി പ്രകാരം തോക്ക്​ കൈവശംവെക്കല്‍ നിയമവിധേയമാണെന്നിരിക്കെ ഇത്​ മറികടക്കല്‍ ബൈഡന്​ എളുപ്പമാകില്ല. തങ്ങളുടെ മൗലികാവകാശത്തിനുമേല്‍ സര്‍ക്കാര്‍ കടന്നുകയറുന്നതിനെതിരെ ജനം നിലയുറപ്പിച്ചാല്‍ നിയമം നടപ്പാക്കല്‍ എളുപ്പമാകില്ല. ടെക്​സസിലെ ബ്രിയാനില്‍ തോക്കുധാരി ഒരാളെ വെടിവെച്ചുകൊല്ലുകയും അഞ്ചു പേരെ പരിക്കേല്‍പിക്കുകയും ചെയ്​ത്​ മണിക്കൂറുകള്‍ക്കിടെയായിരുന്നു ബൈഡന്‍ പുതിയ ഉത്തരവിറക്കിയത്​. കഴിഞ്ഞ മാര്‍ച്ചില്‍ നടന്ന സമാന സംഭവങ്ങളില്‍ മാത്രം 18 പേരാണ്​ തോക്കുധാരികളുടെ വെടിയേറ്റുമരിച്ചത്​.ബൗള്‍ഡര്‍, കൊളറാഡോ, അറ്റ്​ലാന്‍റ, ജോര്‍ജിയ എന്നിവിടങ്ങളിലാണ്​ ​​വെടിവെപ്പുണ്ടായത്​. തോക്ക്​ ''ഒരു മഹാമാരിയാണ്​. അത്​ അവസാനിക്കണം''- ബൈഡന്‍ പറഞ്ഞു. ഉത്തരവു പ്രകാരം അടുത്ത 30 ദിവസത്തിനിടെ നീതിന്യായ വകുപ്പ്​ നാടന്‍ തോക്കുകളുടെ എണ്ണം കുറക്കാന്‍ പ്രത്യേക നിയമം നടപ്പാക്കണം. നിര്‍മിച്ച ഇടവും സ്​ഥാപനവും കണ്ടെത്താനാകാത്ത, സീരിയല്‍ നമ്ബറില്ലാത്ത തോക്കുകളാണ്​ രാജ്യത്ത്​ നിയന്ത്രിക്കപ്പെടുക. വിവിധ സംസ്​ഥാനങ്ങളില്‍ പിടിച്ചെടുക്കുന്ന​ തോക്കുകളില്‍ 40 ശതമാനവും നാടന്‍ തോക്കുകളാണെന്ന്​ പൊലീസ്​ രേഖകള്‍ പറയുന്നു.