മ്യാന്‍മറില്‍ നിന്നുള്ളവര്‍ക്ക്​ താല്‍ക്കാലിക അഭയം നല്‍കുമെന്ന്​ യു.എസ്​

വാഷിങ്​ടണ്‍: സൈന്യത്തിന്‍റെ അതിക്രമങ്ങള്‍ വര്‍ധിച്ച മ്യാന്‍മറില്‍ നിന്നുള്ളവര്‍ക്ക്​ താല്‍ക്കാലികമായി അഭയം നല്‍കുമെന്ന്​ യു.എസ്​. ​ഹോംലാന്‍ഡ്​ സെക്യൂരിറ്റി സെക്രട്ടറി അലാജാണ്ട്രോ മയോര്‍കാസാണ്​ ഇക്കാര്യം അറിയിച്ചത്​. 18 മാസത്തേക്കാവും ഇത്തരത്തില്‍ സംരക്ഷണം നല്‍കുക. നിലവില്‍ യു.എസിലുള്ള മ്യാന്‍മര്‍ പൗരന്‍മാര്‍ക്കാവും ആനുകൂല്യം ലഭിക്കുക.മ്യാന്‍മറിലേക്കുള്ള വിമാന സര്‍വീസുകള്‍ തടസപ്പെട്ടിരിക്കുകയാണ്​. സാമ്ബത്തിക പ്രതിസന്ധിയും രാജ്യത്ത്​ രൂക്ഷമാണ്​. ഈയൊരു സാഹചര്യത്തില്‍ മ്യാന്‍മര്‍ പൗരന്‍മാര്‍ക്ക്​ സ്വന്തം രാജ്യത്തേക്ക്​ മടങ്ങാന്‍ ബുദ്ധിമുട്ടുകള്‍ നേരിടുന്നുണ്ട്​. ഇതിനാലാണ്​ താല്‍ക്കാലികമായി അഭയം നല്‍കുന്നതെന്ന്​ യു.എസ്​ അറിയിച്ചു. മ്യാന്‍മറിലെ ഓങ്​ സാങ്​ സൂചി ഭരണകൂടത്തെ അട്ടിമറിച്ച്‌​ പട്ടാളം അധികാരം പിടിച്ചതോടെയാണ്​ പ്രശ്​നങ്ങള്‍ തുടങ്ങിയത്​. പട്ടാള അട്ടിമറിക്കെതിരെ വന്‍ ജനകീയ പ്രക്ഷോഭമാണ്​ നടക്കുന്നത്​.