പ്രവാസി മലയാളികളുടെ മക്കളുടെ ഉന്നത വിദ്യാഭ്യാസത്തിന് ധനസഹായം; സ്കോളര്‍ഷിപ്പിന് അപേ​ക്ഷ ക്ഷണിച്ചു

തിരുവനന്തപുരം: പ്രവാസി മലയാളികളുടെ മക്കളുടെ ഉന്നത വിദ്യാഭ്യാസത്തിന് ധനസഹായം നല്‍കുന്ന നോര്‍ക്ക റൂട്ട്സ് ഡയറക്ടേഴ്സ് സ്കോളര്‍ഷിപ്പിന് അപേക്ഷ ക്ഷണിച്ചു. സാമ്ബത്തിക ബുദ്ധിമുട്ടുകള്‍ നേരിടുന്ന പ്രവാസി മലയാളികളുടെ മക്കള്‍ക്കാണ് ഉന്നത പഠനത്തിന് ധനസഹായം നല്‍കുന്നത്. രണ്ട് വര്‍ഷമെങ്കിലും വിദേശത്ത് ജോലി ചെയ്ത് തിരികെയെത്തിയവര്‍ക്കും ഇപ്പോള്‍ വിദേശത്തുള്ളവര്‍ക്കും അപേക്ഷിക്കാം. ECR വിഭാഗത്തില്‍പ്പെട്ട അവിദഗ്ദ്ധ തൊഴിലാളികള്‍, ഡ്രൈവര്‍മാര്‍, വീട്ടുജോലിക്കാര്‍ തുടങ്ങിയവരുടെ മക്കള്‍ക്കാണ് സ്കോളര്‍ഷിപ്പ് ലഭിക്കുക. തിരികെ നാട്ടിലെത്തിയവരുടെ വാര്‍ഷിക വരുമാനം ഒന്നര ലക്ഷത്തിലധികരിക്കാന്‍ പാടില്ല. വിദേശത്തുള്ള പ്രവാസികള്‍ക്ക് നോര്‍ക്കയുടെ ID കാര്‍ഡു ഉണ്ടായിരിക്കണം. ബിരുദാനന്തര ബിരുദ കോഴ്സുകള്‍ (എം .എ ,എം. എസ്സി , എം കോം), പ്രൊഫഷണല്‍ കോഴ്സുകളായ എംബിബിഎസ്സ് / ബിഡിഎസ്സ് / ബിഎച്ച്‌ എംഎസ്സ് / ബിഎഎംഎസ്സ് / ബി ഫാം / ബി.എസ്സി .നഴ്സിംഗ്/ ബിഎസ് സി എം എല്‍ റ്റി / എബിഎ , എം സി എ /എഞ്ചിനീയറിംഗ്/ അഗ്രികള്‍ച്ചര്‍ / വെറ്ററിനറി/ എന്നി കോഴ്സുകളില്‍ 2020-21 അധ്യയന വര്‍ഷം ചേര്‍ന്ന വിദ്യാര്‍ത്ഥികള്‍ക്കാണ് സ്കോളര്‍ഷിപ്പ് ലഭിക്കുന്നത്. പഠിക്കുന്ന കോഴ്സുകള്‍ക്കുവേണ്ട യോഗ്യതാ പരീക്ഷയില്‍ ലഭിക്കുന്ന മാര്‍ക്കിന്റെ അടിസ്ഥാനത്തിലാണ് ആനുകൂല്യം നല്കുക. ബിരുദാനന്തര ബിരുദത്തിനു പഠിക്കുന്നവരില്‍ ബിരുദത്തിന് സയന്‍സ് വിഷയങ്ങള്‍ക്ക് 75 ശതമാനത്തിന് മുകളിലും, ആര്‍ട്ട്സ് വിഷയങ്ങള്‍ക്ക്‌ 60 ശതമാനത്തിന് മുകളിലും മാര്‍ക്ക് കരസ്‌ഥമാക്കിയവര്‍ക്കായിരിക്കും സ്കോളര്‍ഷിപ്പിന് അപേക്ഷിക്കാനുള്ള അര്‍ഹത. പ്രൊഫഷണല്‍ ബിരുദ കോഴ്സിന് പഠിക്കുന്നവര്‍ പ്ലസ്‌ടുവിനു 75 ശതമാനം മാര്‍ക്കിന് മുകളില്‍ നേടിയിരിക്കണം. റെഗുലര്‍ കോഴ്സുകള്‍ക്ക് പഠിക്കുന്നവര്‍ക്ക് മാത്രമേ സ്കോളര്‍ഷിപ്പിന് അര്‍ഹതയുള്ളൂ. കേരളത്തിലെ സര്‍വ്വകലാശാലകള്‍ അംഗീകരിച്ച കോഴ്സുകള്‍ക്കും അംഗീകൃത വിദ്യാഭ്യാസ സ്ഥാപനങ്ങളില്‍ പഠിക്കുന്നവര്‍ക്കുമായിരിക്കും സ്കോളര്‍ഷിപ്പിന് അര്‍ഹത. . അപേക്ഷ ഫാറം നോര്‍ക്ക റൂട്ട്സിന്റെ വെബ് സൈറ്റായ www.norkaroots.org ല്‍ ലഭിക്കും. അപേക്ഷ ബന്ധപ്പെട്ട രേഖകള്‍ സഹിതം ചീഫ് എക്സിക്യൂട്ടീവ് ഓഫീസര്‍, നോര്‍ക്ക റൂട്ട്സ് , മൂന്നാം നില, നോര്‍ക്ക സെന്റര്‍ , തൈക്കാട്ട്, തിരുവനന്തപുരം -695014 വിലാസത്തില്‍ 2021 -മാര്‍ച്ച്‌ ആറിനകം ലഭിക്കണം. വിശദവിവരങ്ങള്‍ നോര്‍ക്ക റൂട്ട്സ് ടോള്‍ ഫ്രീ നമ്ബറായ 18004253939 (ഇന്ത്യയില്‍ നിന്നും) 00918802012345 (വിദേശത്തു നിന്നും മിസ്ഡ്കോള്‍ സേവനം) ലഭിക്കും.