ബി.ബി.സിക്ക്​ ചൈനയില്‍ വിലക്ക്​

ബെയ്​ജിങ്​: അന്താരാഷ്​ട്ര വാര്‍ത്ത ചാനലായ ബി.ബി.സി വേള്‍ഡിന്​ വിലക്ക്​ ഏര്‍പ്പെടുത്തി ചൈന. ചൈനീസ്​ ബ്രോഡ്​കാസ്​റ്റിങ്​ ലിമിറ്റഡാണ്​ വിലക്ക്​ ഏര്‍പ്പെടുത്തിയത്​. ഉയിഗൂര്‍ മുസ്​ലിംകളെ സംബന്ധിച്ച്‌​ വിവാദപരമായ ഉള്ളടക്കം സംപ്രേക്ഷണം ചെയ്​തതിലൂടെ രാജ്യത്തെ മാര്‍ഗനിര്‍ദേശങ്ങള്‍ ലംഘിച്ചുവെന്ന്​ ചൂണ്ടിക്കാട്ടിയാണ്​ വിലക്ക്​.യു​.കെ നിയമം ലംഘിച്ചതിന്​ ചൈനീസ്​ ബ്രോഡ്​കാസ്റ്ററായ സി.ജി.ടി.എന്‍ നെറ്റ്​വര്‍ക്കിന്‍റെ ലൈസന്‍സ്​ ബ്രിട്ടന്‍ റെഗുലേറ്റര്‍ അസാധുവാക്കിയതിന്​ പിന്നാലെയാണ്​ ചൈനയുടെ നടപടി. യു.എസ്​ ചാരപ്രവര്‍ത്തനം ആരോപിച്ചതിന്​ പിന്നാലെ ചൈനീസ്​ ടെലികോം ​ഗ്രൂപ്പായ വാവെയ് യുടെ ഫൈവ്​ ജി നെറ്റ്​വര്‍ക്ക്​ സ്​ഥാപിക്കുന്നതില്‍നിന്ന്​ ബ്രിട്ടന്‍ തടഞ്ഞിരുന്നു. ചൈനയിലെ സംപ്രേക്ഷണ മാര്‍ഗനിര്‍ദേശങ്ങളില്‍ ബി.ബി.സി ഗുരുതര ലംഘനം നടത്തിയതായി നാഷനല്‍ റേഡിയോ ആന്‍ഡ്​ ടെലിവിഷന്‍ അഡ്​മിനിസ്​ട്രേഷന്‍ അറിയിച്ചു. വാര്‍ത്തകള്‍ സത്യസന്ധവും നീതിയുക്തവുമാകണമെന്നും ചൈനയ​ുടെ ദേശീയ താല്‍പര്യങ്ങള്‍ക്ക്​ ദോഷം വരുന്നതാകരുതെന്നും പറയുന്നു. ചൈനയില്‍ ബി.ബി.സിക്ക്​ പ്രക്ഷേപണം തുടരാന്‍ അനുവാദമില്ലെന്നും പ്രക്ഷേപണത്തിനുള്ള പുതിയ വാര്‍ഷിക അപേക്ഷ സ്വീകരിക്കില്ലെന്നും ചൈനീസ്​ അധികൃതര്‍ വ്യക്തമാക്കി. ചൈനയുടെ നടപടി നിരാശാജനകം എന്നായിരുന്നു ബി.ബി.സിയുടെ പ്രതികരണം.അതേസമയം, ബി.ബി.സിക്ക്​ വിലക്ക്​ ഏര്‍പ്പെടുത്തിയ നടപടിക്കെതിരെ യു.എസ്​ വക്താവ് ​ രംഗത്തെത്തി. ജനങ്ങള്‍ക്ക്​ മാധ്യമ, ഇന്‍റര്‍നെറ്റ്​ സൗകര്യം പൂര്‍മായും ലഭ്യമാക്കാതെ തടഞ്ഞുവെക്കുന്നത്​ ശരിയല്ലെന്നായിരുന്നു പ്രതികരണം.