കേ​ന്ദ്രത്തിന്​ താക്കീതായി കര്‍ഷകരുടെ റോഡ്​ ഉപരോധം

ന്യൂഡല്‍ഹി: കാര്‍ഷിക നിയമങ്ങള്‍ കൊണ്ടുവന്ന കേന്ദ്രസര്‍ക്കാറിന്​ താക്കീതായി കര്‍ഷകരുടെ റോഡ്​ ഉപരോധം. കാര്‍ഷിക നിയമങ്ങള്‍ പിന്‍വലിക്കണമെന്ന്​ ആവശ്യപ്പെട്ട്​ സംസ്​ഥാന ദേശീയ പാതകളാണ്​ മൂന്നുമണി​ക്കൂറോളം കര്‍ഷകര്‍ ഉപരോധിച്ചത്​. ഡല്‍ഹി അതിര്‍ത്തിയിലെ മിക്ക റോഡുകളിലും ഗതാഗതം സ്​തംഭിച്ചു.

റിപബ്ലിക്​ ദിനത്തില്‍ ട്രാക്​ടര്‍ റാലിക്കിടെ അക്രമ സംഭവങ്ങള്‍ അരങ്ങേറിയ സാഹചര്യത്തില്‍ വന്‍ പൊലീസ്​ സന്നാഹത്തെ ഡല്‍ഹിയില്‍ വിന്യസിച്ചിരുന്നു.ബംഗളൂരുവില്‍ റോഡ്​ ഉപരോധത്തിന്‍റെ ഭാഗമായി 30പേരെ പൊലീസ്​ കരുതല്‍ തടങ്കലിലാക്കി. ഡല്‍ഹിയിലും നിരവധി നേതാക്കളെ തടവിലാക്കി.

ഡല്‍ഹി -ഹരിയാന അതിര്‍ത്തിയായ കുണ്ടലി മുതല്‍ പാല്‍വാല്‍ വരെ കര്‍ഷകര്‍​ റോഡ്​ ഉപരോധിച്ചു. ആംബുലന്‍സുകളെയും അവശ്യ സേവനങ്ങളെയും മാത്രമാണ്​ കടത്തിവിട്ടത്​. പത്താന്‍കോട്ട്​ -ജമ്മു ദേശീയ പാതയും കര്‍ഷകര്‍ ഉപരോധിച്ചു. പഞ്ചാബ്​ -ഹരിയാന അതിര്‍ത്തി സീല്‍ ചെയ്യുകയും കൂടാതെ ചെറുറോഡുകള്‍ അടച്ചിടുകയും ചെയ്​തു.

റോഡ്​ ഉപരോധത്തോട്​ അനുബന്ധിച്ച്‌​ ഡല്‍ഹിയില്‍ 50,000 പൊലീസുകാരെ​യും സേനയെയുമാണ്​​ അധികം വിന്യസിച്ചത്​. രാവിലെ മുതല്‍ എട്ട്​ മെട്രോ സ​്​റ്റേഷനുകള്‍ അടച്ചിട്ടു. ചെ​ങ്കോട്ടയിലും മെട്രോ സ്​റ്റേഷനിലും കനത്ത പൊലീസ്​ സുരക്ഷ ഒരുക്കിയിരുന്നു.

തങ്ങളുടെ ആവശ്യങ്ങള്‍ അംഗീകരിക്കുന്നതുവരെ കര്‍ഷക പ്രക്ഷോഭം അവസാനിപ്പിക്കില്ലെന്ന്​ കര്‍ഷക സംഘടന നേതാവ്​ രാകേഷ്​ ടികായത്ത്​ പറഞ്ഞു. സെപ്​റ്റംബറില്‍ കേന്ദ്രസര്‍ക്കാര്‍ കൊണ്ടുവന്ന മൂന്ന്​ കാര്‍ഷിക നിയമങ്ങള്‍ക്കെതിരെയാണ്​ പ്രതിഷേധം. മാസങ്ങളായി വന്‍ പ്രക്ഷോഭത്തിനാണ്​ ഡല്‍ഹി അതിര്‍ത്തികള്‍ സാക്ഷ്യം വഹിച്ചുകൊണ്ടിരിക്കുന്നത്​.