റവന്യൂ വകുപ്പിലെ സ്ഥലം മാറ്റങ്ങള്‍ ഓണ്‍ലൈനിലേക്ക് മാറ്റാന്‍ സര്‍ക്കാര്‍ ഉത്തരവ്

തിരുവനന്തപുരം: റവന്യൂ വകുപ്പിലെ സ്ഥലം മാറ്റങ്ങള്‍ പൂര്‍ണ്ണമായും ഓണ്‍ലൈനിലേക്ക് മാറ്റാന്‍ സര്‍ക്കാര്‍ ഉത്തരവ് . ഈ മാസം 20 നകം പൊതുസ്ഥലംമാറ്റത്തിനുള്ള അപേക്ഷകള്‍ ക്ഷണിക്കാന്‍ ലാന്‍റ്​ റവന്യൂ കമ്മീഷണറോട് സര്‍ക്കാര്‍ നിര്‍ദേശിച്ചു. അസോസിയേഷന്‍ ഫോര്‍ സ്റ്റേറ്റ് എംപ്ലോയീസ് ആന്‍ഡ്​ ടീച്ചേഴ്സ് (അസെറ്റ് ) സംസ്ഥാന ജനറല്‍ കണ്‍വീനറും റവന്യൂ ഐക്യവേദി സംസ്ഥാന ചെയര്‍മാനുമായ കെ.ബിലാല്‍ ബാബു കേരള അഡ്മിനിസ്ട്രേറ്റീവ് ട്രൈബ്യൂണലില്‍ നല്‍കിയ ഹര്‍ജിയില്‍ രണ്ട് മാസത്തിനകം റവന്യൂ വകുപ്പില്‍ ഓണ്‍ലൈന്‍ സ്ഥലംമാറ്റങ്ങള്‍ നടപ്പാക്കാന്‍ 2020 ജൂലൈയില്‍ നിര്‍ദേശിച്ചിരുന്നു. കോവിഡ് കാരണം അത് നീണ്ടുപോയെങ്കിലും 2021 ജനുവരിയില്‍ പരാതിക്കാരനെയും ലാന്‍റ്​ റവന്യൂ കമീഷണറേയും റവന്യൂ വകുപ്പ് ജോയന്റ് സെക്രട്ടറി നേര്‍ വിചാരണ നടത്തിയാണ് ഉത്തരവായത്. റവന്യൂ വകുപ്പിലെ ജീവനക്കാരുടെ വിവര ശേഖരണം തയ്യാറായി വരുന്നുണ്ടെന്ന ലാന്‍റ്​ റവന്യൂ കമ്മീഷണറുടെ ഉറപ്പ് പരിഗണിച്ച സര്‍ക്കാര്‍ ഫെബ്രുവരി 20 നകം നടപടികള്‍ സ്വീകരിക്കാന്‍ നിര്‍ദേശിച്ചു.