പശ്​ചിമബംഗാളില്‍ തൃണമൂല്‍-ബി.ജെ.പി സംഘര്‍ഷം; നിരവധി വാഹനങ്ങള്‍ കത്തിച്ചു

കൊല്‍ക്കത്ത: പശ്​ചിമബംഗാളിലെ ഹൗറയില്‍ ബി.ജെ.പി -തൃണമൂല്‍ കോണ്‍ഗ്രസ്​ പ്രവര്‍ത്തകര്‍ ഏറ്റുമുട്ടി. നിരവധി പേര്‍ക്ക്​ സംഘര്‍ഷത്തില്‍ പരിക്കേറ്റു. വാഹനങ്ങള്‍ അഗ്​നിക്കിരയാക്കുകയും ചെയ്​തിട്ടുണ്ട്​. പശ്​ചിമബംഗാളില്‍ പ്രധാനമന്ത്രി നരേന്ദ്രമോദി സന്ദര്‍ശനം നടത്താന്‍ മണിക്കൂറുകള്‍ മാത്രം ബാക്കിയുള്ളപ്പോഴാണ്​ സംഘര്‍ഷമുണ്ടായത്​.ഈ രീതിയിലുള്ള രാഷ്​ട്രീയമാണ്​ തൃണമൂല്‍ പിന്തുടരുന്നതെങ്കില്‍ അതേ ഭാഷയില്‍ തന്നെ മറുപടി നല്‍കുമെന്ന്​ ബി.ജെ.പി നേതാവ്​ എ.എന്‍.ഐയോട്​ പ്രതികരിച്ചു. എന്നാല്‍, അക്രമസംഭവങ്ങളില്‍ തൃണമൂല്‍ കോണ്‍ഗ്രസ്​ പ്രതികരണം പുറത്ത്​ വന്നിട്ടില്ല. നേതാജി സുഭാഷ്​ ചന്ദ്രബോസിന്‍റെ ജന്മവാര്‍ഷികത്തിന്‍റെ ഭാഗമായി നടക്കുന്ന ആഘോഷങ്ങളില്‍ പ​ങ്കെടുക്കാനാണ്​ പ്രധാനമന്ത്രി നരേന്ദ്രമോദി പശ്​ചിമബംഗാളിലെത്തുന്നത്​. പശ്​ചിമബംഗാളില്‍ നിയമസഭ തെരഞ്ഞെടുപ്പ്​ നടക്കാനിരിക്കെ മോദി നടത്തുന്ന സന്ദര്‍ശനത്തിന്​ രാഷ്​ട്രീയ പ്രാധാന്യം ഏറെയാണ്​. ​നരേന്ദ്ര മോദി സര്‍ക്കാറിനെതിരെ ഇന്നും രൂക്ഷമായ വിമര്‍ശനങ്ങളാണ്​ മുഖ്യമന്ത്രി മമത ബാനര്‍ജി ഉന്നയിച്ചത്​.