മുസ്​ലിം യാത്രവിലക്ക്​ നീക്കി ബൈഡന്‍; യു.എസ് വീണ്ടും ലോകാരോഗ്യ സംഘടനയില്‍

വാഷിങ്​ടണ്‍: അമേരിക്കയുടെ 46ാം പ്രസിഡന്‍റായി അധികാരമേറ്റ ജോ ബൈഡന്‍ ഒന്നാം നാള്‍ തിരുത്തിയത്​ 15 ട്രംപ്​തീരുമാനങ്ങള്‍. ഏഴു മുസ്​ലിം രാജ്യങ്ങളില്‍നിന്ന്​ അമേരിക്കയിലേക്ക്​ യാത്ര വിലക്കി 2017ല്‍ നടപ്പാക്കിയ നിയമനിര്‍മാണമാണ്​ അതിലൊന്ന്​. ഇനിയും കളയാന്‍ സമയം ബാക്കിയില്ലെന്നു പ്രഖ്യാപിച്ചായിരുന്നു നടപടി. 'മുസ്​ലിം വിലക്കി'ന്​ പ്രസിഡന്‍റ്​ അന്ത്യം കുറിച്ചിരിക്കുന്നു- ഒരു മതത്തോട്​ കടുത്ത വൈരവും വെറുപ്പും നിറഞ്ഞതായിരുന്നു ആ തീരുമാനം''- ബൈഡന്‍റെ വൈറ്റ്​ഹൗസ്​ പ്രസ്​ സെക്രട്ടറി ജെന്‍ പെസ്​കി പറഞ്ഞു.​അമേരിക്കയിലെ മുസ്​ലിം സമൂഹത്തിന്​ ഏറെ ആശ്വാസം പകരുന്നതാണ്​ പുതിയ തീരുമാനം. ഏഷ്യയിലെയും ആഫ്രിക്കയിലെയും മുസ്​ലിം ഭൂരിപക്ഷ രാജ്യങ്ങള്‍ക്കായിരുന്നു നേരത്തെ ഡോണള്‍ഡ്​ ട്രംപ്​ യാത്ര വിലക്ക്​ പ്രഖ്യാപിച്ചത്​. ഇവിടങ്ങളില്‍നിന്ന്​ യു.എസിലേക്ക്​ യാത്ര ഇതോടെ മുടങ്ങിയിരുന്നു. ബൈഡന്‍റെ പുതിയ ഉത്തരവിന്​ പിന്നാലെ ഈ രാജ്യങ്ങളില്‍നിന്ന്​ യാത്ര പുനരാരംഭിക്കാന്‍ വിസ നടപടികള്‍ക്ക്​ തുടക്കം കുറിക്കാനും നിര്‍ദേശം നല്‍കി. ഇറാന്‍, ലിബിയ, സോമാലിയ, ഇറാഖ്​, സുഡാന്‍, സിറിയ, യെമന്‍ എന്നീ രാജ്യങ്ങളില്‍നിന്നുള്ളവര്‍ക്കാണ്​ ട്രംപ്​ വിലക്കേര്‍​പ്പെടുത്തിയിരുന്നത്​. നേരത്തെ ട്രംപ്​ പിന്‍വാങ്ങിയ ലോകാരോഗ്യ സംഘടനയിലേക്ക്​ രാജ്യത്തെ തിരിച്ചെത്തിക്കാനും ബൈഡന്‍ നിര്‍ദേശം നല്‍കി.