Loading ...
തിരുവനന്തപുരം: സംസ്ഥാനത്തെ എന്ജിനിയറിംഗ് കോളജുകള് ഈ മാസം മുതല് ഘട്ടംഘട്ടമായി തുറന്നു പ്രവര്ത്തിക്കുന്നതിന് ശിപാര്ശ ചെയ്തു കൊണ്ട് കേരള സാങ്കേതിക സര്വകലാശാല അക്കാഡമിക് കൗണ്സില് സര്ക്കാരിനു റിപ്പോര്ട്ട് സമര്പ്പിച്ചു. ഈ റിപ്പോര്ട്ടിന് സര്ക്കാര് അംഗീകാരം നല്കിയാല് ഈ മാസം 28 മുതല് സംസ്ഥാനത്തെ എന്ജിനിയറിംഗ് കോളജില് നേരിട്ടുള്ള ക്ലാസുകള് ആരംഭിക്കുന്നതിനുള്ള ക്രമീകരണം ഒരുക്കും.
അക്കാഡമിക് കൗണ്സില് യോഗം ചേര്ന്നു തയാറാക്കിയ റിപ്പോര്ട്ട് സിന്ഡിക്കറ്റിനും സര്ക്കാരിനും സമര്പ്പിച്ചിട്ടുണ്ട്. അക്കാഡമിക് കൗണ്സില് തയാറാക്കിയ പുതിയ ഷെഡ്യൂള് പ്രകാരം ബിടെക് ഏഴാം സെമസ്റ്റര് നേരിട്ടുള്ള ക്ലാസുകളും ലാബ് ക്ലാസുകളും ഈ മാസം 28 ന് ആരംഭിക്കും. 2021 ജനുവരി ഒന്പതു വരെയാണ് ഈ ക്ലാസുകള് നിശ്ചയിച്ചിരിക്കുന്നത്. വിവിധ സെമസ്റ്ററുകളിലെ പരീക്ഷകള് ഫെബ്രുവരി പകുതിയോടെ നടത്താനാണ് അക്കാഡമിക് കൗണ്സില് നല്കിയ ശിപാര്ശ. അടുത്തയാഴ്ച ഇക്കാര്യത്തില് അന്തിമ തീരുമാനം ഉണ്ടാകും.