വൈറ്റ്​ ഹൗസിന്റെ മാധ്യമ സംഘത്തെ പ്രഖ്യാപിച്ചു; എല്ലാവരും വനിതകള്‍

വാഷിങ്​ടണ്‍: നിയുക്​ത അമേരിക്കന്‍ പ്രസിഡന്‍റ്​ ജോ  ബൈഡന്‍ വൈറ്റ്​ ഹൗസിന്റെ  മാധ്യമ സംഘത്തെ പ്രഖ്യാപിച്ചു. സംഘത്തിലുള്ളവരെല്ലാം വനിതകളാണ്​. ബൈഡന്റെ  പ്രചാരണ സംഘത്തിലുണ്ടായിരുന്ന കേറ്റ്​ ബെഡിങ്​ഫീല്‍ഡ്​ ആണ്​ കമ്യൂണിക്കേഷന്‍ ഡയറക്​ടര്‍. ഡെമോക്രാറ്റിക്​ വക്​താവായിരുന്ന ജെന്‍ ​സാക്കി ആണ്​ പ്രസ്​ സെക്രട്ടറി.പ്രധാനപ്പെട്ട മറ്റു പല തസ്​തികകളിലും വനിതകളെ തന്നെ  നിയമിക്കാന്‍​​ ബൈഡന്‍ ഭരണകൂടം ശ്രമിക്കുന്നുണ്ടെന്നാണ്​ പുറത്തു വരുന്ന വിവരങ്ങള്‍. നിലവില്‍ നിയമനം പ്രഖ്യാപിച്ചവരെല്ലാം നേരത്തെ ഒബാമ സര്‍ക്കാറില്‍ പ്രവര്‍ത്തിച്ചവരാണ്​. കേറ്റ്​ ബെഡിങ്​ഫീല്‍ഡ്​ വൈസ്​ പ്രസിഡന്‍റായിരുന്ന ജോ ബൈഡന്റെ  കമ്യൂണിക്കേഷന്‍ ഡയറക്​ടറായിരുന്നു.

ഉദാര-സ്വതന്ത്ര ചിന്തയുടെ വക്​താക്കളായ നീരാ ടാണ്ടനെ പോലുള്ളവരും ബൈഡന്‍ സര്‍ക്കാറിന്റെ  ഭാഗമാകുമെന്നാണ്​ ലഭിക്കുന്ന സൂചനകള്‍. അതേസമയം, കോര്‍പറേറ്റ്​ മേഖലയില്‍ നിന്നുള്ള ഡീസിനെ പോലുള്ളവരെ സര്‍ക്കാറിന്റെ  ഭാഗമാക്കുന്നതിനെതിരെ വിമര്‍ശനങ്ങള്‍ ഉയരുന്നുമുണ്ട്​. ഡീസ്​ നേരത്തെ ഒബാമ സര്‍ക്കാറിന്റെയും ഭാഗമായിരുന്നു.