ലണ്ടന്‍: 50ാം രാജ്യവും ഒപ്പുവെച്ചതോടെ യു.എന്‍ അണുവായുധ നിരോധന കരാര്‍ പ്രാബല്യത്തില്‍. അംഗീകരിക്കപ്പെട്ട അഞ്ച്​ ആണവ ശക്​തികളും ഒപ്പുവെക്കാതെ വിട്ടുനില്‍ക്കുന്നതിനാല്‍ പ്രായോഗികമായി വിജയമെന്നു പറയാനാവില്ലെങ്കിലും കരാര്‍ നിലവില്‍ വന്നത്​ ചരിത്രപിറവിയാണെന്ന്​ അണുവായുധങ്ങള്‍ക്കെതിരെ സമരമുഖത്തുള്ളവര്‍ അവകാശപ്പെടുന്നു.

2017​ല്‍ യു.എന്‍ പൊതുസഭ കൊണ്ടുവന്ന കരാറില്‍ 122 രാജ്യങ്ങള്‍ അംഗീകരിച്ചിട്ടുണ്ടെങ്കിലും പലരും ഒപ്പുവെക്കാന്‍ തയാറായിട്ടില്ല. 50ാമത്തെ രാജ്യം ഒപ്പുവെക്കുന്നതോടെ കരാര്‍ നിയമമാകുമെന്നാണ്​ നേരത്തേയുള്ള വ്യവസ്​ഥ. ഹോണ്ടുറസാണ്​ 50ാമതായി കരാറില്‍ ഒപ്പുവെച്ചത്​. അണുവായുധങ്ങളുടെ നിര്‍മാണം, പരീക്ഷണം, മറ്റുള്ളവരില്‍നിന്ന്​ വാങ്ങല്‍, കൈവശം വെക്കല്‍ തുടങ്ങിയവയെല്ലാം നിയമപ്രകാരം നിരോധിക്കപ്പെട്ടതാണ്​. പ്രയോഗിക്കല്‍ മാത്രമല്ല, പ്രയോഗിക്കുമെന്ന ഭീഷണിയും കുറ്റകരമാണ്​.

അണുവായുധങ്ങള്‍ ലോകത്തുനിന്ന്​ തുടച്ചുനീക്കുന്നതില്‍ നിര്‍ണായക ചുവടുവെപ്പാണ്​ നിയമമെന്ന്​ യു.എന്‍ സെക്രട്ടറി ജനറല്‍ അ​േന്‍റാണിയോ ഗു​​ട്ടെറസ്​ പറഞ്ഞു. പ്രധാന ആണവ ശക്​തികളായ യു.എസ്​, റഷ്യ, ചൈന, യു.കെ, ഫ്രാന്‍സ്​ എന്നീ രാജ്യങ്ങള്‍ ഒപ്പുവെച്ചാലേ കരാറിന്​ ആഗോള തലത്തില്‍ പ്രതിഫലനമുണ്ടാക്കാനാകൂ.