സംസ്ഥാനത്ത് ഏറ്റവും കൂടുതൽ രോഗബാധിതർ ഉള്ള ജില്ലയായി തിരുവനന്തപുരം തുടരുന്നു. ഇന്നലെ രോഗം സ്ഥിരീകരിച്ച 40 പേരിൽ 12 പേരുടെയും രോഗ ഉറവിടം വ്യക്തമല്ല. പൂന്തുറയില്‍ ഇന്നലെ പുതിയ കേസുകളൊന്നും റിപ്പോര്‍ട്ട് ചെയ്തിട്ടില്ല. ഇന്നലെ കൊവിഡ് സ്ഥിരീകരിച്ചവരിൽ വിദേശത്തു നിന്ന് വന്ന 5 പേരെയും ഇതര സംസ്ഥാനത്തു നിന്നു വന്ന 2 പേരെയും മാറ്റി നിർത്തിയാൽ ബാക്കി എല്ലാവരും സമ്പർക്ക രോഗികളോ ഉറവിട മറിയാത്ത കേസുകളോ ആണ്. 21 സമ്പർക്ക കേസുകൾ ജില്ലയിലെ വിവിധ ഭാഗങ്ങളിൽ നിന്നുള്ളവരാണ്. കഴിഞ്ഞ ദിവസങ്ങളിൽ കൂടുതൽ പേർക് രോഗബാധ സ്ഥിരീകരിച്ച പൂന്തുറയിൽ നിന്ന് ഒരു കേസും റിപ്പോർട്ട് ചെയ്തിട്ടില്ല. ഇന്നലെ പരിശോധന നടക്കാത്തതും ഇന്നത്തെ പരിശോധനാ ഫലങ്ങൾ ഉൾപ്പെടാത്തതുമാണ് കാരണം. പൂന്തുറയിൽ രോഗ ബാധ കുറയുകയാണെന്നാണ് ആരോഗ്യ വകുപ്പിന്‍റെ വിലയിരുത്തൽ. പൂന്തുറയോട് ചേർന്നു കിടക്കുന്ന ബീമാപള്ളിയിൽ നിന്ന് 3 കേസും വള്ളക്കടവ് 2 കേസും റിപ്പോർട്ട് ചെയ്തു. ഫോർട്ട്, മന്നം നഗർ, വർക്കല, പാറശാല തുടങ്ങി 14 കേസുകൾ ഉറവിട മറിയാത്തവയാണ്. ജില്ലയിലെ വിവിധ ഭാഗങ്ങളിൽ ഒറ്റപ്പെട്ട കേസുകൾ റിപ്പോർട്ട് ചെയ്യുന്നു എന്നതാണ് പ്രത്യേകത. പൂന്തുറക്കായി നിയോഗിച്ച ദ്രുത പ്രതികരണ സംഘത്തിന്‍റെ ക്യാമ്പ് ഓഫീസ് പൂന്തുറ പുത്തൻ പള്ളി മദ്രസ ഹാളിൽ തുടങ്ങി.