ടെക്സസില്‍ അധികമായി നല്‍കിയ തൊഴിലില്ലായ്മ ആനുകൂല്യം തിരിച്ചു പിടിക്കും

ടെക്സസ് : വര്‍ക്ക്ഫോഴ്സ് കമ്മീഷന്‍ കോവിഡ് 19 ന്‍റെ തുടക്കത്തില്‍ ജോലി നഷ്ടപ്പെട്ടവര്‍ക്ക് ഓവര്‍ പെയ്മെന്‍റ് നല്‍കിയതായി കണ്ടെത്തിയതിനെത്തുടര്‍ന്ന് 46,000 ത്തിലധികം പേര്‍ക്ക് തൊഴിലില്ലായ്മ ആനുകൂല്യങ്ങളുടെ ഒരു ഭാഗം തിരികെ കൊടുക്കേണ്ടി വരുമെന്ന് കണക്കാക്കപ്പെടുന്നു.

ഹൂസ്റ്റണ്‍ ക്രോണിക്കിള്‍ റിപ്പോര്‍ട്ട് ചെയ്ത പ്രകാരം ഓവര്‍ പേയ്മെന്‍റുകള്‍ മാര്‍ച്ചു മുതല്‍ മൊത്തം 32 മില്യണ്‍ ഡോളറിലധികം വരുമെന്നാണ് അറിയാന്‍ കഴിഞ്ഞത്. "എല്ലാ തൊഴിലില്ലായ്മ ആനുകൂല്യ ഓവര്‍ പേയ്മെന്‍റുകളും തിരിച്ചുപിടിക്കാന്‍ ടിഡബ്ല്യുസിക്ക് സംസ്ഥാന നിയമം അനുവദിക്കുന്നുണ്ട്‌," സ്റ്റേറ്റ് ഏജന്‍സിയുടെ വക്താവ് സിസ്കോ ഗമേസ് ഒരു ഇമെയിലില്‍ പറഞ്ഞു. "ഓവര്‍‌പെയ്‌മെന്‍റുകള്‍ തിരിച്ചടയ്ക്കുന്നതുവരെ നിങ്ങളുടെ റിക്കാര്‍ഡില്‍ അത് തുടരും'.

ഒരു കേസില്‍ തൊഴിലില്ലായ്മ തട്ടിപ്പു നടത്തിയെന്ന് ടി‌ഡബ്ല്യുസി കണ്ടെത്തിയാല്‍, ആ വ്യക്തി ആനുകൂല്യങ്ങള്‍ തിരികെ നല്‍കുകയും 15% പിഴ നല്‍കുകയും വേണം. "നിങ്ങള്‍ക്ക് അമിത പണം ലഭിച്ചിട്ടുണ്ടെങ്കില്‍ സംസ്ഥാനം നല്‍കുന്ന മാറ്റാനുകൂല്യം നിങ്ങള്‍ക്ക് നല്‍കാന്‍ കഴിയില്ല," ഗമേസ് പറഞ്ഞു.

ഓവര്‍ പേയ്‌മെന്‍റിന് സംസ്ഥാനം ഉത്തരവാദിയാണെങ്കിലും അല്ലെങ്കിലും അത് സ്വീകര്‍ത്താവിന്‍റെ തെറ്റല്ലെങ്കില്‍ പോലും ആനുകൂല്യങ്ങള്‍ തിരിച്ചടയ്ക്കണം എന്നാണ് നിയമം അനുശാസിക്കുന്നത്.

ഓവര്‍‌പേയ്‌മെന്‍റ് സ്വീകരിച്ച വ്യക്തി പണം തിരികെ നല്‍കിയില്ലെങ്കില്‍, ലോട്ടറി വിജയികള്‍, ക്ലെയിം ചെയ്യാത്ത സ്വത്ത്, തൊഴിലില്ലായ്മ ആനുകൂല്യങ്ങള്‍, മറ്റു സംസ്ഥാന ജോലിയുമായി ബന്ധപ്പെട്ട ചെലവുകള്‍ എന്നിവ ഉള്‍പ്പെടെ ഫണ്ടുകള്‍ തടഞ്ഞുവച്ച്‌ സംസ്ഥാന കം‌ട്രോളറിനു പണം വീണ്ടെടുക്കാന്‍ കഴിയും. പൂര്‍ണമായി തിരിച്ചടവ് നടത്തുന്നതുവരെ കോളജ് വിദ്യാര്‍ഥികള്‍ക്കുള്ള സംസ്ഥാന ധനസഹായം റിലീസ് ചെയ്യാന്‍ കഴിയില്ല.
നോട്ടീസ് ലഭിച്ചവര്‍ പണം തിരികെ നല്കുന്നില്ലെങ്കില്‍, നിയമ നടപടികളുമായി ടെക്സസ് വര്‍ക്ക് ഫോഴ്‌സ് കമ്മീഷന്‍ മുന്നോട്ടു പോകുമെന്നും അറിയിച്ചു.

മാര്‍ച്ച്‌ മുതല്‍ ജൂണ്‍ അവസാനം വരെ, 2.7 ദശലക്ഷം ടെക്സസ് നിവാസികള്‍ തൊഴിലില്ലായ്മ ദുരിതാശ്വാസത്തിനായി അപേക്ഷകള്‍ നല്‍കി.അതില്‍ 46,000ത്തോളം ആളുകള്‍ക്കാണ് അധികം ലഭിച്ച പണം തിരികെ നല്‍കേണ്ടി വരുന്നത്.