ഇന്ത്യക്കും കാലാവസ്ഥാകോപം

മാഡ്രിഡ്‌:കഴിഞ്ഞവര്‍ഷം കാലാവസ്ഥാവ്യതിയാനം ഏറ്റവുമധികം ബാധിച്ച അഞ്ച്‌ രാജ്യങ്ങളില്‍ ഇന്ത്യയും. ജപ്പാന്‍, ഫിലിപ്പീന്‍സ്‌, ജര്‍മനി, മഡഗാസ്കര്‍ എന്നീ രാജ്യങ്ങള്‍ക്കുശേഷം അഞ്ചാമതായാണ്‌ ഇന്ത്യയുടെ സ്ഥാനം. നൂറു വര്‍ഷത്തിനിടയിലെ ഏറ്റവും വലിയ വെള്ളപ്പൊക്കവും ചുഴലിക്കാറ്റും അത്യഷ്‌ണവുമാണ്‌ 2018ല്‍ ഇന്ത്യയെ ബാധിച്ചത്‌. 2.71 ലക്ഷം കോടി രൂപയുടെ (38 ബില്യണ്‍) നാശനഷ്ടമാണ്‌ ദുരന്തങ്ങള്‍മൂലം ഇന്ത്യക്കുണ്ടായത്‌. ജപ്പാനില്‍ വെള്ളപ്പൊക്കം, ഉഷ്‌ണതരംഗം, ചുഴലിക്കാറ്റ്‌ എന്നീ ദുരന്തങ്ങള്‍മൂലം കഴിഞ്ഞ വര്‍ഷം നൂറുകണക്കിനാളുകള്‍ മരിച്ചു. രണ്ടര ലക്ഷം കോടിയോളം രൂപയുടെ നഷ്ടം ജപ്പാനുണ്ടായതായി ജര്‍മന്‍ വാച്ചിന്റെ റിപ്പോര്‍ട്ടില്‍ പറയുന്നു. കഴിഞ്ഞ സെപ്‌തംബറിലുണ്ടായ മാങ്‌ഹട്ട്‌ കൊടുങ്കാറ്റും മണ്ണിടിച്ചിലും ഫിലിപ്പീന്‍സില്‍ വലിയ നാശം വിതച്ചു. ദശലക്ഷക്കണക്കിനാളുകളെ മാറ്റിപ്പാര്‍പ്പിച്ചു. കാലാവസ്ഥാ അപകട സൂചികയില്‍ പറയുന്നു. ജര്‍മനിയെ വരള്‍ച്ചയും ഉഷ്‌ണതരംഗവും കാര്യമായി ബാധിച്ചു. 1250 ആളുകള്‍ മരിക്കുകയും 500 കോടിയോളം രൂപയുടെ നാശനഷ്ടങ്ങള്‍ ഉണ്ടാകുകയും ചെയ്തു. പ്യൂര്‍ട്ടോ റിക്കോ, മ്യാന്‍മര്‍ എന്നിവയാണ്‌ പ്രകൃതിദുരന്തങ്ങള്‍ ഏറ്റവുമധികം ബാധിച്ച മറ്റ്‌ രാജ്യങ്ങള്‍.