വസന്തോത്സവം 2019; ഫെസ്റ്റിവല്‍ ഓഫീസ് ഉദ്ഘാടനം ചെയ്തു

തിരുവനന്തപുരം: വസന്തോത്സവം 2019ന്റെ ഫെസ്റ്റിവല്‍ ഓഫീസ്‌ ഉദ്ഘാടനം കനകക്കുന്നില്‍ സഹകരണ-ടൂറിസം മന്ത്രി കടകംപള്ളി സുരേന്ദ്രന്‍ നിര്‍വഹിച്ചു. മുന്‍ വര്‍ഷങ്ങളില്‍ നിന്നും വ്യത്യസ്തമായി ഇക്കൊല്ലം 14 ദിവസം വസന്തോത്സവം മേള നടക്കുമെന്നും മേള വിപുലമാകുന്നതിലൂടെ വിനോദസഞ്ചാരികളെ കൂടുതലായി ആകര്‍ഷിക്കാന്‍ കഴിയുമെന്നും മന്ത്രി പറഞ്ഞു. ഡിസംബര്‍ 21മുതല്‍ ജനുവരി 3 വരെയാണ് മേള. പുഷ്‌മേള, പുഷ്പ പ്രദര്‍ശന അലങ്കാര മത്സരങ്ങള്‍, കാര്‍ഷിക പ്രദര്‍ശന മേള, ഔഷധ സസ്യപ്രദര്‍ശനം എന്നിവ മേളയുടെ ഭാഗമാകും. ചടങ്ങില്‍ മുഖ്യമന്ത്രിയുടെ ശാസ്ത്ര ഉപദേഷ്ടാവ് എം.സി ദത്തന്‍, ടൂറിസം സെക്രട്ടറി റാണി ജോര്‍ജ്, ഡയറക്ടര്‍ ബാലകിരണ്‍ എന്നിവര്‍ പങ്കെടുത്തു.