ഹര്‍ഷാരവത്തില്‍ സൗദി; പുതു ചരിത്രമെഴുതിയ ആദ്യ വനിതാ ഗുസ്തി മത്സരം കാണാന്‍ ഒഴുകിയെത്തിയത് നൂറുകണക്കിന് കായിക പ്രേമികള്‍, ഏറ്റുമുട്ടലുകള്‍ക്കൊടുവില്‍ വിജയം സ്വന്തമാക്കി നതാലിയ

റിയാദ്: ( 02.11.2019) പുതു ചരിത്രമെഴുതിയ ആദ്യ വനിതാ ഗുസ്തി മത്സരം കാണാന്‍ ഒഴുകിയെത്തിയത് നൂറുകണക്കിന് കായിക പ്രേമികള്‍. സൗദിയില്‍ ചരിത്ര നിമിഷമെഴുതിയ ആദ്യ വനിതാ മത്സരം റിയാദിലാണ് നടന്നത്. ആവേശം അലത്തല്ലിയഅന്തരീക്ഷത്തില്‍ കായിക പ്രേമികളുടെ നെഞ്ചിടിപ്പിന്റെ വേഗതയും സൗദിയില്‍ നിറഞ്ഞിരുന്നു. കഴിഞ്ഞ ദിവസം റിയാദ് കിംഗ് ഫഹദ് സ്റ്റേഡിയത്തിലാണ് ആദ്യ വനിതാ ഗുസ്തി മത്സരം സംഘടിപ്പിച്ചത്.വെള്ളിയാഴ്ച വേള്‍ഡ് റസ്ലിങ് എന്റെര്‍റ്റൈന്റ്‌മെന്റ് താരങ്ങളായ നതാലിയയുടെയും ലേസി ഈവന്‍സന്റെയും മത്സരമായിരുന്നു നടന്നത്. ആദ്യ വനിതാ മത്സരത്തില്‍ നതാലിയ വിജയം സ്വന്തമാക്കി. ടെലിവിഷനില്‍ മാത്രം കണ്ടു പരിചയമുള്ള ലോക ഗുസ്തി താരങ്ങളായിരുന്നു കിംഗ് ഫഹദ് സ്റ്റേഡിയത്തില്‍ വെള്ളിയാഴ്ച നേരിട്ടെത്തിയത്. റിയാദ് സീസണ്‍ ഫെസ്റ്റിവലിനോട് അനുബന്ധിച്ചായിരുന്നു ഗുസ്തി മത്സരം സംഘടിപ്പിച്ചിരുന്നത്. പുരുഷന്മാരുടെ ഗുസ്തി മത്സരവും വെള്ളിയാഴ്ച റിയാദില്‍ നടന്നു.