സെക്രട്ടേറിയറ്റ് @150; വാര്‍ഷിക ആഘോഷ ചടങ്ങുകള്‍ക്ക് ഇന്ന് തുടക്കം

തിരുവനന്തപുരം: ഭരണസിരാകേന്ദ്രമായ സെക്രട്ടേറിയറ്റ് 150-ാം ജന്‍മദിനത്തിന്റെ നിറവില്‍. ഒരാഴ്ച നീണ്ടുനില്‍ക്കുന്ന നൂറ്റി അമ്ബതാം വാര്‍ഷികാഘോഷപരിപാടികള്‍ ഇന്ന് വൈകിട്ട് 4.30ന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. സൗത്ത് സാന്‍ഡ്വിച്ച്‌ ബ്ലോക്കിന് സമീപം നടക്കുന്ന ചടങ്ങില്‍ സ്പീക്കര്‍ പി ശ്രീരാമകൃഷ്ണന്‍ അദ്ധ്യക്ഷത വഹിക്കും. 5.30 മുതല്‍ സാംസ്‌കാരിക പരിപാടികള്‍.
1869 ജൂലായ് എട്ടിന് ആയില്യം തിരുനാള്‍ രാമവര്‍മ്മരാജാവാണ് സെക്രട്ടേറിയറ്റ് ഉദ്ഘാടനം ചെയ്തത്. റോമന്‍, ഡച്ച്‌ വാസ്തുവിദ്യാ ശൈലികള്‍ സമന്വയിപ്പിച്ച ഈ കെട്ടിടം വില്യം ബാര്‍ട്ടനാണ് രൂപകല്‍പ്പന ചെയ്തത്. ദിവാന്‍ ടി മാധവ റാവുവിന്റെ മേല്‍നോട്ടത്തിലായിരുന്നു നിര്‍മ്മാണം. നാല് വര്‍ഷം നീണ്ടുനിന്ന ജോലികള്‍ക്കായി 3 ലക്ഷം ചെലവഴിച്ചതായി ഔദ്യോഗിക രേഖകള്‍ വ്യക്തമാക്കുന്നു. ദര്‍ബാര്‍ ഹാള്‍ ഉള്‍ക്കൊള്ളുന്ന കേന്ദ്ര ഘടന യാണ് ബാര്‍ട്ടന്‍ രൂപകല്‍പ്പന ചെയ്തത്. അടുത്തുള്ള കെട്ടിടങ്ങള്‍ പിന്നീട് കൂട്ടിച്ചേര്‍ക്കുകയായിരുന്നു. ചിത്തിരതിരുനാള്‍ മഹാരാജാവായി കിരീടമണിഞ്ഞതാണ് സെക്രട്ടേറിയറ്റില്‍ രാജഭരണകാലത്ത് ഒടുവില്‍ നടന്ന ചടങ്ങ്. 1933 ഡിസംബര്‍ 12 ന് അന്നത്തെ വൈസ്രോയി പുതിയ അസംബ്ലി കെട്ടിടത്തിന് തറക്കല്ലിട്ടു. 1939 ഫെബ്രുവരി 6 ന് ദിവാന്‍ സര്‍ സി. പി. രാമസ്വാമി അയ്യര്‍ രണ്ടാം ശ്രീമുലം അസംബ്ലി ഈ കെട്ടിടത്തില്‍ വിളിച്ചു ചേര്‍ത്തു. നാട്ടുരാജ്യത്ത് ഹുസൂര്‍ അല്ലെങ്കില്‍ പുത്തന്‍ കച്ചേരി എന്നറിയപ്പെട്ടിരുന്ന ഇതിനെ 1949 ല്‍ സര്‍ക്കാര്‍ സെക്രട്ടേറിയറ്റ് എന്ന് പുനര്‍നാമകരണം ചെയ്തു. കേരളത്തിന്റെ ഭരണത്തിന്റെ നാഡീ കേന്ദ്രമാണ് സെക്രട്ടേറിയറ്റ്. അതിനാല്‍ രാഷ്ട്രീയ പ്രതിഷേധത്തിന്റെ കേന്ദ്രം കൂടിയാണ് ഇത്. കേരള സെക്രട്ടേറിയറ്റ് കോംപ്ലക്‌സില്‍ 3 ബ്ലോക്കുകളാണുള്ളത്. സെന്‍ട്രല്‍ ബ്ലോക്ക് ഏറ്റവും പഴയ ഘടനയാണ്. സെന്‍ട്രല്‍ ബ്ലോക്കിന്റെ പ്രധാന വാതില്‍ ആന കവാടം എന്നാണ് അറിയപ്പെടുന്നത്. ഇത് ഗ്രാന്‍ഡ് ദര്‍ബാര്‍ ഹാളിലേക്കാണ് തുറക്കുന്നത്. തിരുവിതാംകൂര്‍ മഹാരാജാവും അദ്ദേഹത്തിന്റെ പ്രമാണിമാര്‍ക്കും മാത്രമേ ദര്‍ബാര്‍ ഹാളില്‍ പ്രവേശനമുണ്ടായിരുന്നുള്ളു. ഇന്ന് ദര്‍ബാര്‍ ഹാള്‍ പൊതുയോഗങ്ങളും സംസ്ഥാന ചടങ്ങുകളും നടക്കുന്ന ഹാളാക്കി മാറ്റി. ദര്‍ബാര്‍ ഹാളിന്റെ ഇരുവശത്തും 20 വാതിലുകളുണ്ട്. സെന്‍ട്രല്‍ ബ്ലോക്കില്‍ വിവിധ വകുപ്പുകളുടെ രണ്ട് നിലകളുണ്ട്. വലതുവശത്ത് സെന്‍ട്രല്‍ ബ്ലോക്കിന്റെ താഴത്തെ നിലയിലാണ് പഴയ അസംബ്ലി ഹാള്‍ സ്ഥിതിചെയ്യുന്നത്, ഇത് ഇപ്പോള്‍ മ്യൂസിയമാക്കി മാറ്റി. സെന്‍ട്രല്‍ ബ്ലോക്കിന് പുറമെ നോര്‍ത്ത് ബ്ലോക്ക്, സൗത്ത് ബ്ലോക്ക് എന്നീ രണ്ട് പുതിയ ബ്ലോക്കുകള്‍ സെന്‍ട്രല്‍ ബ്ലോക്കിന്റെ ഇരുവശത്തും നിര്‍മ്മിച്ചു. സൗത്ത് ബ്ലോക്ക് തുറന്നത് 1961 ഓഗസ്റ്റ് 18ന് അന്നത്തെ മുഖ്യമന്ത്രി പട്ടം എ. താണുപിള്ളയായിരുന്നു. പിന്നീട് കേന്ദ്രത്തിനും പുതിയ ബ്ലോക്കുകള്‍ക്കുമിടയില്‍ രണ്ട് 'സാന്‍ഡ്വിച്ച്‌' ബ്ലോക്കുകളും നിര്‍മ്മിച്ചു. നോര്‍ത്ത് ഗേറ്റില്‍ സ്ഥിതിചെയ്യുന്ന നോര്‍ത്ത് ബ്ലോക്ക്, കേരള മുഖ്യമന്ത്രി, ഏതാനും കാബിനറ്റ് മന്ത്രിമാരുടെ ഓഫീസുകള്‍, കാബിനറ്റ് മുറി എന്നിവയാണുള്ളത്. സൗത്ത് സാന്‍ഡ്വിച്ച്‌ ബ്ലോക്കിലും നോര്‍ത്ത് സാന്‍ഡ്വിച്ച്‌ ബ്ലോക്കിലും സര്‍ക്കാര്‍ സെക്രട്ടറിമാരുണ്ട്. വടക്കന്‍ ബ്ലോക്കിലെ തിരക്ക് കാരണം മന്ത്രിമാരുടെ ഏതാനും ഓഫീസുകള്‍ ഇവിടെയുണ്ട്. ആഘോഷങ്ങളുടെ ഭാഗമായി ആര്‍ക്കൈവ്‌സ് ഡിപ്പാര്‍ട്ട്‌മെന്റ് ആര്‍ക്കിയോളജി രേഖകളുടെ ഒരു പ്രദര്‍ശനം സംഘടിപ്പിച്ചിട്ടുണ്ട്. ചരിത്ര പ്രാധാന്യമുള്ള സംഭവങ്ങള്‍ ചിത്രീകരിച്ച ഫോട്ടോഗ്രാഫുകളുടെ പ്രദര്‍ശനം ഇന്‍ഫര്‍മേഷന്‍ ആന്റ് പബ്ലിക് റിലേഷന്‍സ് വകുപ്പ് സംഘടിപ്പിക്കും. കുട്ടികള്‍ക്കുള്ള ചിത്രകലാ മത്സരം, സെക്രട്ടേറിയറ്റിന്റെ ചരിത്രം ഉയര്‍ത്തിക്കാട്ടുന്ന ഡോക്യുമെന്ററികള്‍, സെമിനാറുകള്‍ എന്നിവയും ഉണ്ടാകും. പൊതുജനങ്ങള്‍ക്ക് പഴയ അസംബ്ലി ഹാളും എക്‌സിബിഷനുകളും സന്ദര്‍ശിക്കാം.